Reitór Semináriu Menór Nossa Senhora de Fátima Balide, Dili, Pe. Angelo Salsinha. Imajen Tatoli/Cipriano Colo.

DILI, 05 juñu 2020 (TATOLI)–Koordenadór Ekipa Pastorál COVID-19 Arkedioseze Metropolitna Dili, atuál Reitór Semináriu Nossa Senhora de Fátima Balide, Pe. Angelo Salsinha, informa ekipa Pastorál COVID-19 Arkediseze Metropolitana Dili, apoia ona família 7.000-resin ne’ebé kuran ai-han durante situasaun Coronavirus (COVID-19) no iha períodu estadu emerjénsia datoluk ne’e.

“Ita konsege distribui ona sasan nesesidade báziku ba família kuaze 7.000, no fós ne’ebé ardkedioseze rasik distribui ona maka saka 2.000 resin, la inklui vigararia no parókia sira ne’ebé distribui direta iha ida-idak ninia komunidade,”  dehan Pe. Angelo Salsinha, ba Ajénsia TATOLI liuhosi entrevista iha Balide, Dili, sesta ne’e.

Reitór semináriu menór ne’e hateten, apoiu sira ne’e maihosi Vatikanu, Papa Francisco rasik liuhosi nunsiatura ho montante $16.000 ne’ebé fahe ba dioseze tolu no mós orsamentu balun hosi arkediseze ninia fundu rasik.

Alende ne’e, ekipa pastorál ne’e hetan mós apoiu hosi emprezáriu sira rai laran hanesan Jonize, BTK, EDS, Delos, Perisos, no familia sira ne’ebé ho boa-vontade oferese pesoál, grupu kategoriál sira, hodi hala’o servisu ne’e to’o ohin loron no kontinua fahe. Etapa dahuluk ba parokia sira kuaze oferese hotu ona no segunda faze mak sei iha prosesu nia laran, bainhira situasuan kontinua nafatin hanesan ne’e.

Ho apoiu ne’ebé iha, nia hatutan, ekipa Pastorál arkedioseze nian durante situasuan ne’e, tau matan ba família sira ne’ebé kategoria vulnerável liu, hanesan ai-leba sira iha estrada, sira ne’ebé maka loro-loron iha lixeiru Tibar, sira ne’ebé suru rai henek iha Mota Comoro, maluk difisiente sira, inklui sira ne’ebé sofre moras TBC no HIV-SIDA iha uma mahon sira, no família sira iha bairru sira ne’e parokia ida-idak mak responsabiliza.

Padre Angelo esplika, ekipa ne’e rasik estabelese tanba inisitiva husi Arsebispu Metropolitana Dili, Dom Virgílio do Carmo da Silva SDB, liuhusi despaixu ida hodi nomeia Padre Angelo Salsinha hanesan Kooderadór, vise maka Madre Guilhermina, FDCC, divizaun sosiál karitativa lidera husi diretór Caritas Arkedioseze Dili, Padre Adriano Ola Duli, diresaun espirituál lidera husi irmaun Silvino, CMM hamutuk ho komunidade relijioza-relijioza sira, vigáriu foraneo no  pároku sira.

Ekipa pastorál ne’e, esatabelese iha loron 24 fulan abríl, tanba arsebispu rasik haree ba realidade nasaun nian bainhira mosu situasuan Coronavirus (COVID-19), ne’ebé pasiente barak no iha ezijénsia makaas presijz ai-han akompañamentu  morál, psikolojia, no espirituál ba pasiente sira.

“Haree tuir ida-ne’e mak arsebispu foti inisiativa ida hodi halibur komunidade relijiozu-relijioza, oinsá tau hanoin hamutuk forma ekipa ida -ne’e atu bele tau matan,” nia hateten.

Maski nune’e, husi divizaun espirituál aprezenta ona ba Govenu maibé seidauk estabelese servisu hamutuk ho Centro Intergarado Getão Crise (CIGC), tanba haree ba númeru pasiente ne’ebé menus ona, mantein de’it komunikasaun no preparadu ba kooperasaun bainhira situasuan ne’e ejize duni.

“Divizaun ne’ebé lideradu hosi irmaun Silvino, CMM, hamutuk ho Irmã sira ne’ebé iha espesialidade ba área psikolojia no saúde, hodi tau matan espesiál ba ita nia maluk afetadu COVID-19 ninian, hodi akompaña ba espirituál, morál, durante situasaun ne’e. Ekipa ne’e hanesan ekipa Kreda nian, ne’ebé preparadu atu bele fó apoiu bainhira mosu situasuan grave, to’o ema mate karik, mate ho dignidade ho ekompañamentu espesiál,” nia hateten.

Ekipa ida seluk ne’ebé funsiona desde estabelesimentu no la’o to’o ohin loron mak ekipa ida-ne’ebé lidera hosi Padre Adriano Ola Duli, hanaran ekipa sósio karitativa, ne’ebé servisu hamutuk ho parókia sira atu tau matan ba sarani sira iha bairru sira, apoiu sosiál karitativa ba família sira ne’ebé kuran ai-han, nune’e bele sustenta aan durante situasaun ne’e.

Arkedioseze rasik, prevee orsamentu $20.000 atu bele apoia família sira ne’ebé kuran ai-han, iha futuru, bainhira situasaun CIVID-19 kontinua eziste.

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here