Imajen : Google

DILI, 04 juñu 2020 (TATOLI)-Tuir dadus husi Ofisiál Programa Saúde Mentál Ministériu Saúde relata hahú husi tinan 2005 to’o 2019 liubá rejista ona sidadaun ho problema saúde mentál hamutuk ema na’in 2015, feto 1078 no mane 937.

Ofisiál Programa Saúde Mentál, Anabela Guterres, informa Ministériu Saúde rekoilla dadus ne’e liuhosi responsavel moras mentál husi kada Sentru Saúde sira iha territóriu Timor-Leste bazea ba sistema tratamentu ho meiu fahe ai-moruk no konsellu ba pasiente sira.

“Iha ne’e ami distribui moras mentál tuir jéneru feto hamutuk 1078 mane hamutuk 937 totál hamutuk 2015,” informa Anabela Guterres ba TATOLI iha nia servisu fatin Lahane, kinta (04/06)

Husi tinan 2000 to’o 2004 programa saúde mentál ne’e responsabiliza husi Organizasaun Naun Govermentál PRADET, maibé iha 2005 entrega hikas responsabilidade ne’e ba Ministériu Saúde mak toma konta.

“Husi 2005 to’o agora ami fó treinamentu ba pesioál saúde sira hamutuk 200-resin ba sentru saúde sira entaun programa ne’e mós halo tratamentu iha Sentru Saúde no kada Sentru Saúde ne’e iha programa saúde mentál iha hotu,” tenik Anabela.

Atu fó tratamentu no asisténsia ba ema moras mentál sira iha Timor-Leste maka durante ne’e Ministériu saúde servisu hamutuk ho Sentru Apoiu Saúde Mentál São João de Deus Laclubar hodi fó tratamentu kada fulan tolu depois rekupera re-integra hikas ba família pasiente idaidak.

“Fatin iha sentru Saúde Laklubar ne’e ba Munisípiu 13 hotu
maibé ita lori ida ne’ebé mak grave liu  ba ne’ebá hodi halo tratamentu saúde,” nia esplika.

Nia rekomenda ba ofisiál saúde mentál no família idaidak atu fó tratamentu ba pasiente ho liafuan mamar, evita hasai liafuan kro’at hasoru sira tanba sei aumenta pursentajen traumátiku.

“Entaun servisu ida ne’e la’ós pesoál saúde de’it maibé, ita servisu hamutuk mós ho família sira para suporta malu,”katak Nia.

Husi tinan 2015 to’o 2020 ne’e pasiente ho problema saúde mentál hamutuk 50-resin maka konsege rekupera  tanba kura ho ai-moruk no halo konsellu.

Entretantu, Sentru Apoiu Saúde Mentál São João de Deus Laclubar, iha sala internamentu hamutuk 12, no tuir dadus iha tinan 2019 nia rohan fatin ne’e akumula sidadaun ho problema mentál hamutuk 50-resin.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here