Primeiru-Ministru, Taur Matan Ruak. Imajen Tatoli/ Egas Cristovão

DILI, 04 juñu 2020 (TATOLI)–Prezidente Repúblika, Francisco Guterres “Lú Olo”, autoriza ona eis Ministru Planeamentu no Finansas iha VII Governu Konstitusionál Rui Gomes atu lidera ekipa rekoperasaun ekonómika rai laran.

Autorizasaun ne’e, hafoin Primeiru-Ministru (PM), Taur Matan Ruak, aprezenta pedidu durante enkontru semanál iha Palásiu Prezidente Nicolau Lobato, Bairru Pité, Dili.

“Ko’alia mós kona-ba planu rekoperasaun ekonómiku, ne’ebé hanoin ona atu prepara. Tanba ne’e, ha’u halo pedidu ida ba Prezidente Repúblika, atu bele autoriza Rui Gomes, hodi bele lidera ekipa ne’ebé sei aprezenta planu ba rekooperasaun ekonómiu,” PM Taur hateten ba jornalista sira, kinta ne’e.

Ekipa ne’e rasik sei haree ninia termu referénsia kona-ba planu ho ninia mekanizmu ezekusaun.

“Agora Prezidente Repúblika autoriza ona no naturalmente sei kria ekipa, atu bele haere mós ba termu referénsia, kona-ba planu ba oin ne’e halo oinsa. Maibé, ne’e aban bain rua mak ita-boot sira sei hatene tan,” Xefe governu ne’e hateten.

Entretantu, mensajén Prezidente Repúblika, Francisco Guterres nian ba selebrasaun, 20 fulan Maiu 2020, Loron Restaurasaun Independénsia Timor-Leste ba dala-19 hateten, durante estadu emerjénsia periudu tolu perante situasaun COVID-19, governu konsege salva vida Povu nian maibé ekonomia la buras.

Tanba ne’e, Prezidente-Repúblika konxiente katak atividade ekonómika rai laran ladún la’o, produtu internu brutu mós tun. Relatóriu anuál hosi Banco Centrál fó-sai katak, ekonomia TL hahú sa’e uitoan iha tinan kotuk maibé iha tinan ida-ne’e, tuun ba pursentu ida (1%).

Xefe estadu esplika, ekonomia tun tamba fatór lubun ida, hanesan Orsamentu Jerál Estadu xumba iha Parlamentu Nasionál no obriga Estadu moris ho rejime duodésimu de’it; udan boot ne’ebé afeta uma-ka’in lubun ida iha Kapitál Dili no iha munisípiu balun; maluk barak tenke hapara sira-nia atividade fila-liman hodi bele hadook-an husi moras COVID-19.

Fatór sira ne’e hotu afeta tebes ba timoroan sira ne’ebé moris husi sira-nia negósiu kiik, médiu no boot. Ho rendimentu ne’ebé kiik ka menus, família-sira lakon kbiit hodi sosa ai-han no produtu sira seluk ne’ebé presiza lorloron.

Tanba ne’e, Xefe estadu fiar no hanoin katak importante tebes hala’o filafali ajenda reforma sosiál no ekonómika atu bele hakbiit no sustenta ekonomia bele buras babeibeik.

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here