Parlamentu Nasionál. Imajen Tatoli/Egas Cristovão

DILI, 03 juñu 2020 (TATOLI)—Komisaun Espesializada Lima (5) iha Parlamentu Nasionál (PN), ohin, konklui ona eleisaun ba meza komisaun no Bankada Frente Revolucionária de Timor-Leste Independente (FRETILIN) lidera Komisaun A (Justisa no Konstitusionál) no Komisaun D (Ekonomia no Dezenvolvimentu).

Hosi bankada PLP lidera Komisaun E (Infraesturura) no Komisaun F (Saúde, Seguransa Sosiál no Igualdade Jenéru). Bankada KHUNTO lidera Komisaun G (Edukasaun, Juventude, Kultura no Sidadania.

Prezidente Komisaun A Foun, Deputadu Joaquim dos Santos, hateten sei fó prioridade ba Lei Anti Korrupsaun, Lei Protesaun Sivíl no Lei Podér Lokál.

Joaquim dos Santos konsidera kna’ar ne’e hanesan votu konfiansa polítika hodi lidera Komisaun A no haree mós ba lei sira-ne’ebé sei pendente hela.

“Ne’ebé aban ba-oin ne’e ami tenke organiza fali ajenda tuir matéria ne’ebé parlamentu husu atu aselera lalais. Agora lei ne’ebé urjente liu mak protesaun sivíl tanba Prezidente Parlamentu baixa tiha ona mai Komisaun A no B,. Aban ami sei haree uluk lei ida-ne’e. Depois ida-ne’e mai tama kedas ba Lei Antí Korrupsaun nian tanba materia ba LAK ne’e atu besik hotu ona,” Deputadu Joaquim dos Santos informa ba Jornalista sira, hafoin konklui eleisaun iha Parlamentu Nasionál, kuarta ne’e.

Loron ohin, membru Komisaun Espesializada hahú hosi Komisaun A, D, E, F no G iha ona kompozisaun meza komisaun foun ho estrutura kompletu maibé ba Komisaun B (Negósiu Estranjeiru, Defeza no Seguransa) no Komisaun C (Finansa Públika) sei realiza eleisaun iha aban (kinta, 4/6/2020).

Prezidente Komisaun A (Justisa no Konstitusionál) foun mak Deputadu Joaquim dos Santos hosi Bankada FRETILIN, Vise-Prezidente Komisaun A mak Deputadu Francisco Vasconcelos hosi PLP, Sekretáriu mak Deputadu José Pacheco hosi FRETILIN. Antes ne’e, Komisaun A lidera hosi Deputada Carmelita Caetano Monis hosi Bankada CNRT, Vise mak Deputadu Francisco Vasconcelos hosi PLP no Sekretáriu mak Deputadu Oscar de Araújo hosi CNRT.

Entretantu, Prezidente Komisaun D (Ekonomia no Dezenvovlimentu), Deputadu Antoninho Bianco hosi Bankada FRETILIN no Vise mak Deputada Olinda Guterres hosi Bankada KHUNTO no Sekretáriu mak Deputadu Alexandrino Cardoso da Cruz hosi FRETILIN. Antes ne’e, Komisaun D lidera hosi Deputada Virgínia Ana Belo hosi CNRT, Vise mak Ricardo Baptista hosi CNRT no Sekretária mak Deputada Olinda Guterres hosi KHUNTO.

Hosi parte Komisaun E (Infrestrutura ) nian, Deputadu Abel Pires da Silva hosi Bankada PLP re-eleitu ba Prezidente Komisaun E (Infraesturura), Vise-Prezidente Komisaun E mak Deputadu Fabião de Oliveira hosi FRETILIN no Sekretária mak Deputada Ana Bela Savio hosi FRETILIN. Antes ne’e, komisaun ne’e lidera hosi Deputadu Abel Pires da Silva hosi PLP, Vise mak Deputadu Marcos Xavier hosi CNRT no Sekretária mak Deputada Ana Bela Savio hosi FRETILIN.

Prezidente Komisaun F (Saúde, Seguransa Sosiál no Igualdade Jenéru) foun mak Deputadu Noé da Silva Ximenes hosi PLP, Vise mak Félix da Costa “Anin Buras” hosi Bankada FRETILIN no Sekretária Meza Komisaun F, Deputada Helena Martins Belo hosi Bankada FRETILIN. Antes ne’e, Prezidente Komisaun F, Deputada Maria “Gorumali” Barreto hosi Bankada CNRT, Vise Noé da Silva Ximenes “Buka-Tuir” hosi PLP, Sekretária Deputada Lúcia Taeki hosi Bankada CNRT.

Nune’e mós Prezidente Komisaun G (Edukasaun, Juventude, Kultura no Sidadania) foun mak Deputadu António Verdiál de Sousa hosi Bankada KHUNTO, Vise mak Deputada Josefa Pereira hosi FRETILIN no Sekretária mak Deputada Gabriela Alves hosi FRETILIN. Antes ne’e, Komisaun G lidera hosi Deputada Albina Freitas (Matebian), Vise mak Sabino Soares “Guntur” hosi PLP no Sekretáriu mak Gabriel Soares hosi Bankada CNRT.

Komisaun Espesializada hala’o eleisaun ne’e bazeia ba Rejimentu Parlamentu Nasionál (RPN) artigu 31 (Eleisaun ba Meza Komisaun sira-nian) alínea 1 katak, iha inísiu lejizlatura idak-idak, iha loron lima nia laran liu tiha dezignasaun ba Deputadu sira hodi sai membru komisaun, komisaun idak-idak sei reúne, ho prezidénsia temporária hosi Deputadu ne’ebé tinan boot liu, hodi hatuur sira-nia serbisu no hili sira-nia presidente, vise-presidente no sekretáriu.

Alínea 2 hosi artigu ne’e esplika, distribuisaun membru meza komisaun sira-nian tenke assegura, konforme posível, reprezentasaun proporsionál husi bankada parlamentár sira iha Parlamentu.

Alínea 3 hosi artigu ne’e fundamenta, deputadu membru komisaun ida-nian bele, bainhira de’it, rekere eleisaun foun ba Meza, bainhira nia justifika loloos.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here