Irrigasaun iha munisípiu. Imajen/PNDS

DILI, 03 juñu 2020 (TATOLI) Relasiona ho udan boot iha loron 22 maiu iha Parte Kosta Súl no Leste to’o provoka inundasaun, povu agrikultór sira hetan impaktu tanba irrigasaun no natar hetan estragu, tanba ne’e Governu liuhosi Ministériu Agrikultura no Peska (MAP) buka hela meiu hodi rezolve problema hirak ne’e.

Diretora Jerál MAP, Odete Maria do Ceu Guterres, infoma dadus ne’ebé diresaun nasionál simu konfirma iha kanál irrigasaun boot haat mak hetan estragu tanba mota sobu inklui natar.

“Dezastre naturál estraga kanál boot haat hanesan iha irrigasaun Larisula Manufahi, Karau-ulun, Webaba no Suai Kasa nian, inklui irrigasaun kiik oan sira seluk tan,” deklara Diretór Jerál MAP ba Agência Tatoli, kuarta ne’e.

Kanál irrigasaun boot iha área Larisula foin mak halo iha tinan kotuk ne’ebé iha poténsia ektare 700, maibé agora kuda hela hare kuaze ektare 400.

“Hare sira ne’e seidauk to’o Susu-ben, maibé akontese dezastre naturál iha área irrigasaun iha Larisula 01 nian, ne’ebé kuaze metru 15 mak hetan estragu totál, tanba ne’e daudaun bee sei suli hela ba natar kuaze ektare 400,” tenik Odete Maria.

Enkuantu irrigasaun Webaba parte Suai Loro nian, natar hamutuk ektare 230 mak mota sobu maibé sei bele salva ho razaun seidauk to’o hare Susu-ben (kabuki) no seidauk tama hare Tasak.

Tuir Diretora Odete katak iha irrigasaun Webaba hare ektare 13 maka hetan estragu totál.

“Hare sira ne’e ko’a hotu ona no seidauk lori ba fatin atu dulas, udan to’o mai no mota lori hotu kedas. Restu di’ak hela, tanba hare barak foin kuda no nia buras hela maski udan boot maibé sei bele salva. Ezemplu hanesan irrigasaun Maliana no Zumalai sira maski mota tama maibé la konsege sobu estragu hare-oan sira,” nia akresenta.

Nune’e MAP sei foti alternativu hodi rezolve.

“Tanba laiha osan MAP haruka de’it ekipamentu hanesan eskavatór neen hodi ajuda povu sira ke’e bee dalan, nune’e bele halo normalizasaun ba bee  no haruka buka tan kontainer balun hodi ense rai-henek hodi taka bee dalan husi mota ninin ne’ebé amaesa ba povu nia natar,” nia realsa.

Dirijente ne’e rekoñese, maski tempu agora labele halo konstrusaun maibé buka meiu atu rezolve, inklui medida seluk maka MAP sei haruka kontentór haat hodi ense rai-henek nakonu hodi satan bee hodi labele suli tama ba natar-laran ho kuantidade barak.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here