Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (03/06). Imajen Tatoli/Egas Cristovão

DILI, 03 juñu 2020 (TATOLI) – Liuhosi reuniaun Konsellu Ministru (KM) aprova ona proposta autorizasaun ba Parlamentu Nasionál (PN) hodi halo transferénsia estraordinária husi Fundu Petrolíferu ho montante millaun $286,8 hodi sustenta mákina Estadu inklui reforsa Fundu COVID-19 ne’ebé la sufisiente kobre despeza ba pakote ekonómiku.

Ministru ba Prezidénsia Konsellu Ministru, Fidelis Manuel Leite Magalhães, informa razaun atu halo levantamentu tanba reseita ne’ebé maihusi reseita fiskál no saldo ezekusaun orsamentál husi tinan kotuk, ne’ebé kompleta husi transferénsia estraordináriu husi Fundu Petrolíferu autorizadu hosi Lei númeru 2/2020 loron 6 abríl nian la sufisiente atu finansia atividade regulár Administrasaun Públika nian.

Aleinde ne’e, fulan-agustu nian ho montante ne’ebé atribui ba Fundu COVID-19 hatudu katak la kobre despeza tomak ne’ebé previstu tuir medida prevensaun no kombate pandemia COVID-19.

“Diploma ne’e ho objetivu atu fó autorizasaun hodi realiza transferénsia estraordináriu hosi Fundu Petrolíferu ho valór millaun $286,8 hodi garante kondisaun finanseiru sufisiente ba funsionamentu normál Administrasaun Públika to’o loron ne’ebé aprova ona Orsamentu Jerál Estadu ba tinan fiskál 2020,” relata Ministru Fidelis liuhosi konferénsia imprensa iha Palásiu Governu, kuarta ne’e.

Alterasaun dahuluk ba diploma ne’e ho objetivu atu klarifika katak finalidade husi fundu ne’e sei finansia mós medida ba apoiu ekonómiku no protesaun sosiál, hodi  hatán ba konsikuénsia ekonómiku kona-ba medida prevensaun no kombate ba moras COVID-19 no krize ekonómika mundiál ne’ebé provoka hosi pandemia no mós despeza ba funsionamentu fundu ne’e rasik.

Antes ne’e, iha loron 2 abríl PN aprova pedidu levantamentu Governu no iha loron 6 abríl Prezidente Repúblika, Francisco Guterres ‘Lú Olo’ promulga ona Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu, millaun $150 aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba konta jerál tezouru no husi millaun $150 ne’e, aloka $500.000 ba PN atu dezenvolve polítika no programa iha ámbitu prevensaun no kombate surtu COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here