AILEU, 03 juñu 2020 (TATOLI)–Organizasaun Internasionál, Plan Internasionál no UNICEF iha Timor-Leste, kuarta ne’e oferese apoiu ekipamentu prevensaun COVID-19 ba eskola públiku hamutuk 150 iha Munisípiu Aileu, no Ainaro.

Fasilidade ne’ebé maka sira konsege apoiu ona maka tanki bee moos, balde, sabaun, aisar, máskara, livru no seluk tan hamutuk item 14 hodi fasilita estudante sira atu bele proteje an husi transmisaun surtu coronavirus.

Ministra Edukasaun Juventude no Desportu, Dulce de Jesus, reprezenta Governu konstitusionál daualu hodi agradese ba tulun ne’ebé oferese husi UNICEF ho Plan Internasionál.

“Ohin ita hotu akompaña ona ekipamentu prevensaun COVID-19 ne’e ne’ebé UNICEF ho PLAN Internasional oferese ne’e sei bá eskola hamutuk 150, iha Ainaro eskola hamutuk 85 no iha Aileu eskola 70,”esplika Dulce ba jornalista sira iha eskola Ensinu Báziku Sentrál das Flores Munisípiu Aileu, ohin.

Ho apoiu ne’e, Dulce fiar katak sei tulun estudante no profesór sira hodi prevene COVID-19 hafoin re-ativa prosesu aprendijazen.

Entretantu, Reprezentante UNICEF iha TL, valérie Taton, relata to’o oras ne’e apoiu ona ekipamentu prevensaun COVID-19 hamutuk pakote 400.000 ba Ministériu Edukasaun hodi distribui faze dahuluk nian ba eskola sira iha Munisípiu Aileu, Viqueque, Dili o Ermera.

“Maibé ami la para de’it ho Munisípiu Lima ne’e, ami sei fó tan apoiu ekipamentu ba eskola sira iha Munisípiu sira seluk tanba agora daudaun ami-nia doadór  sira garante  ona orsamentu ba ami purvolta millaun 4, ho ida ne’e ami sei apoiu liutan ba eskola sira iha Timor-Leste inklui mós Ministériu Saúde rasik,”nia promete.

Jornalista : Tomé Amado

Editór        : Agapito dos Santos

HAKEREK NO HATÁN

Please enter your comment!
Please enter your name here