Prezidente Tribunál Rekursu, Deolindo dos Santos, fó posse ba Juiz na'in-haat Tribunál Rekursu, Tersa (02/06/2020). Imajen/Egas Cristovão

DILI, 02 juñu 2020 (TATOLI) – Prezidente Tribunál Rekursu (PTR) Deolindo dos Santos, tersa (02/06/2020), fó posse ba juiz foun na’in-tolu ho Juiz Administradór Rejiaun Espesiál Oe-cusse Ambeno.

Serimónia posse ne’e bazeia ba despaxu Prezidente Tribunál Rekursu no Prezidente Konsellu Superiór Majistratura Judisiál, katak, juiz foun hirak ne’e, termina ona sira nia estájiu hanesan juiz durante ne’e iha tribunál.

Juiz hirak ne’ebé simu posse ne’e, kompostu husi Juiza Patricia de Fatima Xaviêr, Juiz Yudy Pamukas, Juiz Evangelino Velo ho Juiz Hugo da Cruz Pui, ne’ebé sai Juiz Administradór Tribunál Oe-cusse.

Prezidente Tribunál Rekursu Deolindo dos Santos hateten, juiz foun na’in tolu hahú ohin ba oin asume kargu hanesan ho juiz sira seluk.

Nia tenik tan, ba juiz administradór ne’ebé sai responsavel ba Tribunál Oe-cusse sei asegura serbisu prosesu nian no halo jestaun ba funsionamentu tomak.

“Husi tomada posse aumenta juiz na’in-tolu ne’e, espera fasilita serbisu tribunal nian,” hateten PTR Deolindo dos Santos, iha nia diskursu.

Nia mós husu ba juiz foun sira ho vokasaun ne’ebé hili atu serve ho responsabilidade no dedikasaun ba  povu ho nasaun. Hanesan iha artigu 118 Konstituisaun Repúblika Demokrátika Timor-Leste (KDRTL).

PTR Deolindo dos Santos husu atu enposadu sira tenke kumpre maneira oinsá halo serbisu refleta ema seluk nia vida, ho nune’e, ezije iha étika tenke sai ezemplár ba ema hotu iha lei nia oin.

Enposadu Hugo da Cruz Pui ne’ebé asume kargu Juiz Administradór Oe-cusse kompromete sei hadi’a kondisaun sira hodi apoiu serbisu tribunál no garante funsionamentu tribunal nian

Serimónia posse ne’e partisipa  mós husi Ministru Justisa Manuel Cárceres da Costa, Prokuradór Jerál Repúblika (PGR, sigla portugés), José Ximenes, Provedora Direitu Umanu no Justisa (PDHJ), Jesuína Ferreira Gomes, Komisáriu Komisaun Anti-Korrupsaun (CAC), Sergio Hornai, Defensór Públiku Jerál, Câncio Xavier no konvidadu sira seluk tan.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here