Ministra Saude foun, Odete Maria Freitas Belo. Imajen/Palasiu Sinzas, Ministeriu Saude

DILI, 02 juñu 2020 (TATOLI)-Ministériu Saúde daudaun ne’e halo ona estudu ba proposta ne’ebé aprezenta husi Ministériu Edukasaun Juventude no Desportu (MEJD), no Ministériu Ensinu Superiór Siénsia no Kultura (MESSK) hodi re-ativa prosesu aprendijazen ba eskola sira iha territóriu Timor-Leste.

Ministra Saúde, Odete Maria Freitas Belo, informa asuntu ne’e durante enkontru ho Ministru Ensinu Superiór Siénsia no Kultura, Longuinhos dos Santos, MEJD no mós Reitór Universidade sira iha Eis Edifísiu Ministériu Finansa Dili, tersa (02/06/2020).

Odete dehan tan katak maski nia parte hahú estuda ona proposta ne’e maibé presiza konsulta tan ho entidades balun antes foti desizaun final atu nune’e labele mosu implikasaun negativu ba prosesu ne’e.

“Oras ne’e ninia parte sei haree hela no sei esforsu halo konsultasaun ho parte balun atu hetan liutan sujestaun ruma wainhira atu foti desizaun ba prosesu ne’e,”dehan Ministra Saúde ne’e, tersa ohin.

Tanba ne’e, Nia dehan seidauk garante atu aprova lalais pedidu ne’e hodi re-ativa prosesu aprendijazen ba estudante sira.

Iha parte seluk Governante ba Setór saúde ne’e  akresenta tan katak atu re-ativa prosesu aprendijazen ba labarik sira, presiza reforsa seguransa iha fronteira hodi evita movimentu ema tama no sai iha fronteira ho ilegál tanba fasil atu lori transmisaun surtu COVID-19 mai rai-laran.

“Ha’u simu informasaun direita husi Diretór sira ne’ebé mak servisu iha fronteira Terrestre Mota Masin, Mota Ain no Wini, sira dehan atividade ida tama sai entre ita ho Atambua no Kupang ne’e sei kontinua hela,” katak Governante ne’e.

Nia argumenta katak Timor-Leste lakohi atu mosu tan kazu transmisaun COVID-19 ba estudante sira bainhira movimentu ilegál iha fronteira sei kontinua la’o.

“Ita lakohi kondisaun iha fronteira mantein hela ho movimentasaun tama sai, depois desidi ativa ona atividade eskola sira, ita hakarak atividade eskola sira la’o ho di’ak no fó garantia ba Inan-Aman sira atu labele tauk wainhira re-ativa ona eskola sira bele haruka oan sira fila-fali ba eskola ho vontade,” nia reforsa liután.

Entretantu, tuir dadus ne’ebe maka asesu husi Kompas.com hateten iha Provínsia Nusa Tenggara Timur (NTT) Indonézia to’o fin maiu 2020 ne’e rejista kazu COVID-19 pozitivu hamutuk 97, rekupera 14 no mate ema na’in ida.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here