Kompañia internasionál China Wuyi nahe pavimentu asphalt iha estrada Tasi-Tolu. Imajen/Mídia-MOP

DILI, 01 juñu 2020 (TATOLI) – Ministériu Obra Públika (MOP) liuhusi ekipa interministeriál hahú prosesa pagamentu indemnizasaun ba sasán afetada hamutuk 142 husi abitante na’in-49, husi projetu haluan estrada husi Tasi-Tolu to’o Rotunda Comoro.

Estrada Tasi-Tolu to’o Rotunda Comoro ho naruk kuaze kilómetru rua hamutuk ho pakote estrada trosu Tibar to’o Tasi-Tolu, toma konta husi kompañia internasionál China Wuyi ho kustu millaun $12-resin.

Diretór Jerál Obra Públiku, Rui Hernani, hateten abitante aseita ona padraun kompensasaun tuir Estadu Timor-Leste.

“Ami prosesa ona pagamentu ba abitante sira nia sasán afetada iha faze dahuluk hamutuk 45 no daruak hamutuk 66 ho totál hamutuk 111. Enkuantu falta 31, ekipa hahú kompleta dokumentu balun ne’ebé la kle’ur tan ramata no tempu besik halo ona pagamentu fazeadamente ba abitante afetadu na’in-49”, tenik Dirijente ne’e ba Agência Tatoli iha ninia kna’ar fatin, Bebora, segunda ne’e.

Notísia Relevante: MOP Aprezenta Padraun Indemnizasaun ba Abitante Afetada Tasi-Tolu to’o Rotunda Comoro

Tuir Diretór ne’e, orsamentu ba indemnizasaun disponível ona no hein de’it ekipa interministeríál haruka dadus ba Governu hodi halo pagamentu ba abitante afetada hirak ne’e.

“Ita-nia abitante afetada sira aseita ona ho padraun indemnizasaun no kada uma-kain iha deklarasaun, tanba ne’e sira prontu simu no husik fatin ne’e atu projetu ne’e bele la’o ho di’ak”, Rui Hernani akresenta.

Kona-ba totál orsamentu ba indemnizasaun, Diretór Jerál MOP ne’e afirma, seidauk bele fó sai ninia montante, hein atu halo pagamentu mak anúnsia dala ida.

Rui Hernani adianta, prosesu la’o tarde oituan tanba Governu sei buka hela orsamentu ba konstrusaun estrada ne’e.

Ho nune’e, Governu liuhosi Ministru Obra Públika, Salvadór Eugênio Soares dos Reis Pires husu ona apoia husi Banku Dezenvolvimentu Aziátiku (ADB, sigla Inglés) atubele foti osan husi fundu impréstimu.

“Ita hakarak pagamentu hotu komunidade husik ona fatin atu obra ne’e la’o, maibé ita mós seidauk iha osan ba konstrusaun ne’ebé Governu lobby hela ADB”, Diretór Rui realsa.

Antes ne’e, Koordenadór Ekipa Interministérial husi Unidade Jestaun Projetu MOP, Carlos Alberto, informa ekipa interministeriál hala’o aprezentasaun kona-ba padraun kompensasaun tuir Estadu Timor-Leste nia bá Komunidade afetadu ba projetu haluan estrada husi Tasi-Tolu to’o Rotunda-Comoro, hanesan uma, kioske, moru, ai-horis no seluk tan.

Hahú 24 fevereiru to’o 5 abríl 2020, komunidade afetadu sira asina ona konkordánsia ba kustu indemnizasaun atu ekipa interministeriál hahú prosesa iha fulan tuirmai atu osan tama iha sira nia konta bankária bazeia ba sira-nia konkordánsia ho Governu.

Ekipa interministeriál ne’e kompostu husi MOP, Ministériu Justisa (MJ), Ministériu Administrasaun Estatál (MAE), Ministériu Agrikultura no Peska (MAP), Munisipál Dili no líder komunitáriu sira.

Ministru Salvador orienta ona ekipa interministeriál atu aselera libertasaun iha área konstrusaun obra, tanba tuir governante ne’e, Governu iha responsabilidade tenke prepara kondisaun infraestrutura estrada molok Portu Tibar ne’e halo operasaun iha tinan-2021.

“Kuandu infraestrutura portu ne’e tama iha operasaun, iha akordu Governu tenke prepara no prontu ona atu sustenta operasaun Portu Tibar nian, tanba kestaun ne’e urjente oituan se la’e Governu kona koima $50.000 kada loron”, nia esplika.

Obra ne’e hahú iha loron 28 fevereiru 2017 no tuir previzaun sei ramata iha outubru 2019, maibé tanba problema administrasaun projetu ne’e suspende provizóriu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here