Primeiru-Ministru, Taur Matan Ruak, hamutuk ho labarik sira. Imajen/Mídia-GPM

DILI, 01 juñu 2020 (TATOLI) – Loron 01 juñu nu’udar Loron Mundiál ba Labarik, ne’ebé iha loron espesiál ne’e kada-tinan Timor-Leste komemora ho atividade oin-oin, maibé iha tinan ida-ne’e Governu la konsege komemora tanba surtu COVID-19, tanba ne’e Primeiru-Ministru (PM), Taur Matan Ruak hato’o ksolok no felisita labarik sira.

Xefe Governu husu labarik sira atu estuda maka’as tanba labarik maka futuru ba nasaun nian.

“Iha loron espesiál ida ne’e hakarak apela ba labarik sira hotu atu aproveita imi-nia tempu osan mean ne’e ho didi’ak ho estuda, tanba estuda maka halo ini-nia futuru nabilan ba Timor-Leste. Ha’u nia mensajen save ba imi labarik sira, estuda, estuda! dukur no mate iha livru nia leten, dala ita tan parabéns”, refere nota ofisiál husi Governu ne’ebé Agência Tatoli asesu, segunda ne’e.

Governu liuhosi Komisaun Direitu ba Labarik sira-nian sei kontinua buka meiu atu tau matan ba labarik sira nia direitu fundamentál sira, ne’ebé hatuur ona iha polítika Governu nian.

“Ohin loron nu’udar Loron Mundiál ba Labarik sira iha mundu tomak, inklui mós Labarik sira iha Timor-Leste, ne’ebé kada-tinan sempre festeza ho animasaun oin-oin hodi motiva labarik sira atu dezenvolve sira-nia talentu ba futuru, maibé infelizmente ba tinan ida-ne’e ita la iha selebrasaun ruma tanba surtu COVID-19”, PM subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here