Dadus atuál COVID-19 iha Timor-Leste. Imajen/CIGC

DILI, 01 juñu 2020 (TATOLI) – Hafoin Organizasaun Mundiál Saúde (OMS) deklara COVID-19 hanesan pandemia globál, nasaun hotu iha mundu komesa foti medida prevensaun ba surtu ne’e, inklui Timor-Leste deklara Estadu Emerjénsia no hahú suspende movimentasaun iha odomatan nasaun nian, hanesan iha fronteira terestre, aeroportu no marítima.

Nune’e, hahú Prezidente Repúblika dekreta Estadu Emerjénsia faze dahuluk, ne’ebé hahú entra ein vigór iha loron 28 marsu hahú oras 00:00 to’o 26 abríl 2020 oras 23:59, fó dalan ba Governu implementa médida espesífiku sira hodi prevene propagasaun COVID-19, liuliu estabelese konfinamentu obrigatóriu loron 14 ba ba sidadaun ne’ebé maihusi nasaun afetadu COVID-19 tama territótiu nasionál.

Dadus ne’ebé fó sai husi Sala Situasaun, Sentru Integradu Jestaun Krize (CIGC, sigla portugés) iha segunda ne’e, hatudu katak ema ne’ebé pasa ona loron 14 konfinamentu obrigatóriu to’o ohin loron sa’e ba 2.356, kompara ho loron kinta (28/05) ne’ebé hamutuk 2.311.

Sidadaun 2.356 ne’ebé kumpre ona loron 14 konfinamentu obrigatóriu, kompostu husi na’in-1.845 iha Dili, Oé-cusse 191, enkuantu seluk iha munisípiu 12.

Tanba ne’e, ema ne’ebé sei kumpre konfinamentu obrigatóriu hamutuk 55, kompara ho loron-haat liubá ne’ebé sei falta ema 74, enkuantu ema ne’ebé sei kumpre auto-kuarentena to’o ohin loron hamutuk 12.

Ema ne’ebé sei kumpre kuarentena obrigatóriu kompostu husi na’in-45 iha fasilidade Governu ne’ebé estabelese iha Dili, enkuantu na’in-haat iha Covalima no na’in-neen iha Oé-cusse.

Ba sira ne’ebé sei iha auto-kuarentena, na’in-sia iha Dili, Baucau ida, Bobonaro ida no Oé-cusse ida.

To’o ohin loron, númeru komulativu ne’ebé halo ona teste laboratóriu hamutuk 1.581, husi totál ne’e na’in-1.544 maka hatudu rezultadu negativu, enkuantu na’in-13 maka sei hein rezultadu teste.

Hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu rejista iha loron 24 abríl ho totál konfirmadu na’in-24 no provável na’in-haat.

Husi totál konfirmadu ne’e, na’in-22 rejista iha Kapitál Dili enkuantu na’in-rua seluk rejista iha Munisípiu Liquiçá.

Enkuantu, iha loron 15 maiu, liuhosi Sala Situasaun, CIGC deklara pasiente konfirmadu no provável rekuperadu hotu ona.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no tama mai Timor-Leste liuhosi dalan fronteira terrestre no aeroportu.

Hahú loron 15 maiu, sistema alerta no resposta COVID-19 iha Timor-Leste  ne’ebé antes ne’e iha alerta 3 ‘Mitigasaun’, fila ba faze alerta 1 ‘Kontensaun’, nune’e komunidade sira bele kontinua halo prevensaun ba an rasik.

Coronavírus deteta ba dahuluk iha dezembru 2019 iha sidade xineza, Wuhan, no to’o oras ne’e ema hamutuk 6.303.920 ona maka infetadu moras ne’e iha mundu tomak no husi númeru ne’e ema hamutuk 374.569 maka lakon ona vida tanba vírus ne’e, enkuantu ema hamutuk 2.867.565 maka rekupera.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here