DILI, 01 juñu 2020–Espoza Prezidente Repúblika, Cidália Nobre Lopez Mouzinho Guterres, hato’o mensajen ba labarik sira iha komemorasaun Loron Mundiál Labarik sira-nian katak labarik Timor-Leste nian mak sai nu’udár esperansa ba futuru.

“Labarik sira maka esperansa ba loron aban bainrua nian. Atu realiza esperansa ne’e, ita hotu tenk investe ka tau matan hahú hosi familia,” dehan Cidália Nobre liu-hosi komunikadu ne’ebé Ajénsia TATOLI asesu, segunda ne’e.

Inan nasaun ne’e hateten, loron ohin la hanesan loron bai-bain iha tinan sira liu ba kotuk, tanba ne’e liuhosi mensajen ida-ne’e hakarak hato’o hakuak boot nakonu ho domin ba oan doben sira ne’ebé maka namkari iha Timor-Leste nia laran tomak.

Cidalia hatutan, situasaun ne’ebé mosu iha Timor-Leste ho rai barak iha mundu, moras ho naran COVID-19, obriga Estadu Timor-Leste renova ba datoluk Estadu Emerjénsia ho nune’e seidauk normaliza fali atividade sira hotu.

“Oan doben sira hotu, situasaun surtu COVID-19 afeta duni ba prosesu aprendijazen labarik sira nu’udár estudante, tanba labarik sira hotu hela no hakmatek de’it iha ida-idak nia fatin no balun inan-aman haruka tiha ba iha foho. Ita hatene katak ho Estadu Emerjénsia limitasaun ba movimentu trava mós direitu balun labarik sira-nian. Maibé, limitasaun sira-ne’e nu’udár dalan ba prevensaun virus nia hada’et no salva ona oan doben sira hosi virus ne’e. Ho Grasa Nai Maromak nian, ita-nia rain livre hosi mate tanba moras Virus Corona,” nia hatutan.

Cidália apela ba inan-aman sira atu família hotu tenke akompaña nafatin oan sira iha uma, kuidadu sira-nia saúde, fó ai-han nutritiva ba sira, kuidadu ijiene no labele haluha halo tuir nafatin mensajen sira ne’ebé hato’o ona husi Organizasaun Saúde Mundial ho Governu nian liu-hosi Ministeriu Saúde.

Ba inan-aman sira, halo nafatin prevensaun liga ba moras COVID-19 no moras seluk ne’ebé perigu ba vida labarik ki’ik sira-nian (hanesan malária, dengue, diarea ho seluk seluk tan), tanba durante ne’e labarik balun mate ona tanba moras dengue tuir relatóriu hosi Ministériu Saúde nian.

Hosi parte sorin, nia husu presiza kuidadu labarik sira-nia saúde no husu mós ba inan-aman ho família sira atu akompaña sira iha uma, hodi kaer nafatin livru, kadernu, lapis hodi hakerek, lee no halo konta no seluk seluk tan, liga ba prosesu aprendijazen iha uma durante Estadu Emerjénsia.

“Labarik labele sai vitima ba situasaun ida-ne’e. Foin lalais ha’u ba vizita Postu Administrativu Ataúro, ha’u simu informasaun hosi labarik sira katak sira-nia liman toos, ha’u husu tanba sa? Tanba durante ne’e halimar loos de’it, la kaer lapis ho kadernu hodi hakerek, ne’e labele. Nu’udár família, tenki tau matan hodi fahe tempu ba sira atu halimar natón, estuda no ajuda inan-aman sira iha tarefa ki’ik sira ne’ebé la boot, liu-liu labarik sira-nia forsa ho idade. Ho asaun sira  nune’e maka direitu labarik sira-nian ba edukasaun no saúde la soe leet de’it, tanba impaktu hosi COVID-19,” nia konta tuir.

Nia mós husu ba instituisaun relevante sira ne’ebé tau matan ba labarik sira, asegura nafatin polítika ne’ebé di’ak hodi proteje labarik ki’ik no forsa laek sira-nia direitu oin-oin ne’ebé konsagra ona.

Ikusliu, nia husu ba Organizasaun ho Uma Mahon sira ne’ebé eziste iha rai-laran maka halibur ona oan ki’ak ki’ik oan sira ne’ebé lakon inan-aman, abandonadu, balun ne’ebé lahetan domin, lahetan nesesidade hosi inan-aman tanba kbiit maka mukit, balun mós tamba kondisaun fizika ne’ebé limitadu, maka uma mahon sira kuida ba, inan nasaun ne’e hato’o obrigada wain organizasaun sira, kongregasaun no misaun ne’ebé sagrada.

“Ita-boot sira hakonu ona labarik sira ho saida maka ita-boot sira bele halo, tuir ida-idak nia programa no atividade. Ha’u-nia orasaun ba Nai sei haraik tulun ba ita-boot sira hotu hodi kontinua nafatin knaar sira ne’e no kuidadu sira sai labarik ne’ebé forte iha isin no klamar nian. Mai ita hadook kiik sira hosi moras oin-oin no  hahalok la di’ak sira ne’ebé sei trava sira-nia future,” nia apela.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here