Ministra Edukasaun Juventude no Desportu, Dulce de Jesus Soares, akompana Vise Ministru, Joao Zacarias Freitas Soares, halo konferensia imprensa .Imajen/Agapito dos Santos.

DILI, 31 maiu 2020 (TATOLI)-Governu liuhosi Ministériu Edukasaun Juventude no Desportu (MEJD), durante konferénsia imprensa, domingu (31/05/2020) ohin, husu ba Diretór, Koordenadór, Profesór, estudante no komunidade edukativa sira hodi hahú halo limpeza liliu hamoos sala aprendijazen no areadóres eskola idak-idak iha loron 01 fulan-juñu 2020.

Ministra Edukasaun, Dulce de Jesus Soares, informa limpeza ne’e atu halo preparasaun ba prosesu aprendijazen ne’ebé maka sei re-ativa durante fulan-juñu hafoin Ministériu Saúde aprova padraun ba implementasaun hodi prevene transmisaun surtu coronavirus.

“Ministériu Edukasaun Juventude no Desportu sei hato’o filafali loron hahú prosesu aprendijazen prezensiál bainhira Ministériu Saúde aprova ona padraun implementasaun prevensaun COVID-19 iha eskola sira hotu,”dehan, Ministra Dulce de Jesus Soares, iha Vila-Verde Dili, ohin.

Maibe,Governante ne’e hatutan atu identifika loloos eskola sira kria duni kondisaun ba estudante sira maka tuir planu Ministériu Saúde no MEJD sei halo supervizaun iha territóriu Timor-Leste. Supervizaun ne’e sei halo husi estrutura Ministériu Edukasaun nivél nasionál to’o baze.

Nune’e mós nia apela ba Dirijente no Koordenadór eskola sira hodi hahú prepara atividade edukativu sira relasiona ho prosesu aprendijazen prezensiál.

“Atu prevene hada’et COVID-19, iha eskola sira tenki prepara fasilidade fase liman, hanesan bee moos, no sabaun ba estudante sira hotu, molok tama aula, durante halimar no atividade seluk tan,”tenik Governante.

Atu prepara fasilidade sira ne’e iha eskola idaidak maka Governu autoriza ba dirijente eskola sira hodi uza osan konsensaun eskolár fulan-tolu, komesa marsu to’o maiu nian ne’ebé la konsege ezekuta durante implementasaun estadu emerjénsia.

Meiu seluk hodi prevene transmisaun COVID-19 ba estudante sira maka MEJD no INFORDEFE sei fó formasaun obrigatóriu ba profesór no Dirijente eskola sira iha área fronteira terrestre hanesan Munisípiu Bobonaro, Covalima no Rejiaun Autónomu Espesiál Oé-Cusse Ambeno (RAEOA) tanba fronteira diretamente ho Provinsia Nusa Tenggara Timur (NTT) Indonezia ne’ebé daudaun ne’e risku ba COVID-19.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here