Sekretáriu Estadu Komunikasaun Sosiál, Mericio Juvinal dos Reis “Akara” hala’o lansamentu Rádiu Streaming online ba Rádiu Komunidade 14 iha Munisípiu Liquiça, sesta (29/05/2020). Imajen/Eugénio Pereira

LIQUIÇA, 29 maiu 2020 (TATOLI) – Sekretaria Estadu Komunikasaun Sosiál (SEKOMS) liuhusi Diresaun Nasionál Sentru Rádiu Komunidade (CRC, sigla portugés), sesta ne’e, halo ona lansamentu ba rádiu streaming online ba Rádiu komunidade 14.

Serimónia lansamentu ne’e hala’o ofisiálmente iha estasaun Rádiu Komunidade Tokodede iha Munisípiu Liquiça husi Sekretáriu Estadu Komunikasaun Sosiál (SEKOMS), Mericio Juvinal dos Reis “Akara” ne’ebé asiste mós husi Prezidente Konsellu Imprensa (CI, sigla portugés), Virgílio da Silva Guterres, Adjuntu Administradór Munisípiu Liquiça, Renato Nunes Serão, ho mós konvidadu importante seluk-tan.

Radio komunidade 14 ho sira nia sítiu eletróniku (online) ne’ebé lansa ne’e mak hanesan  Rádiu Komunidade Liquiça ho nia sítiu enderesu www.radiotokodede.org, Rádiu Komunidade Lospalos (www.radiolospalosvoxpopuly.org), Rádiu Komunidade Comoro, Dili, (www.radiocomoro.org), Rádiu Komunidade  Oe-Cusse (www.radioatonilifau.org), Rádiu Komunidade Ermera (www.radio-cafe.org), (www.rcc.tl), Rádiu Komunidade  Manufahi  (www.radio1912.org), Rádiu Komunidade  Manatuto, (www.radioiliwai.org), Rádiu Komunidade Baucau (www.radiomatebian.org), Rádiu Komunidade Maliana (www.radiomaliana.org), Rádiu Komunidade Maubise-Ainaro (www.radiomauloko.org), Rádiu Komunidade Viqueque (www.radiopovuviqueque.org), Rádiu Komunidade Aileu (www.radiohusar.org), ho mós Radiu Komunidade Bucoli-Baucau (www.sahebucoli.org).

Sekretáriu Estadu Komunikasaun Sosiál, Mericio Juvinal dos Reis “Akara” akompaña husi Prezidente Konsellu Impresa, Virgilio Guterres, Adjuntu Administradór Munisípiu Liquiça, Renato Nunes Serão, hala’o lansamentu ba Rádiu Streaming online ba Rádiu Komunidade 14 iha Munisípiu Liquiça, sesta (29/05/2020). Imajen/Eugénio Pereira

Sekretáriu Estadu Mericio  Akara iha serimónia lansamentu ne’e hateten,  lansamentu rádiu streaming online ba rádiu komunidade 14  iha munisípiu hodi aumenta rádiu komunidade sira-nia audiénsia ba públiku hodi moderniza no dezenvolve rádiu komunidade nia asesu iha tempu dijitalizasaun teknolojia internet ne’ebé modernu.

Prezensa rádiu komunidade, hateten Mericio Akara, importante tebes, tanba ho dijitalizasaun rádiu komunidade sira sei lori Timor-Leste ba fatin hotu no ba audiénsia tomak bele asesu ona informasaun husi rádiu komunidade através live streaming ho sítiu eletrónika.

“Ita kontente, tanba ita lansa tan programa ida husi analog ba dijitál, tanba ohin loron ho dijitalizasaun teknolojia ema akompaña informasaun ho live,” dehan Mericio Akara iha nia diskursu.

Akara konsidera programa ne’e tama iha plataforma foun, husi analog ba dijitál hodi fasilita informasaun ba povu ho di’ak liután.

Tuir dadus ne’ebé SEKOMS rekolla katak, kuaze 60% iha Timor-Leste povu  iha ona telefone hodi bele asesu informasaun husi no live streaming sira no sítiu eletrónika sira.

“Kuaze 60% povu iha ona telefone, maibé ita presiza halo levantamentu  tan para buka hatene informasaun hodi hetan dadus klaru. Tanba kuaze 70% ita nia povu asesu informasaun iha radio RTTL no radio komunidade sira, maibé ha’u dezafia ekipa atu ba halo duni levantamentu hodi atualiza informasaun,” Akara tenik.

Polítika governu, Akara tenik tan, fasilita rádiu sira ba dijitál ne’e atu muda husi analog ba dijitál nu’udar plataforma hodi hasae kualidade audio no informasaun ne’ebé rádiu sira fó sai ho loloos hodi fasilita komunikasaun entre povu kada munisipiu liuhusi rádiu idak-idak nia programa para halo promosaun ba komunidade hodi akompaña.

Iha fatin hanesan, reprezentante Jestór Rádiu Komunidade 14 ne’ebé reprezenta husi Jestór Radio Komunidade Lospalos, Nascimento Profincial, hato’o agradese ba governu bele ajuda ona rádiu komunidade sira hodi hakat pasu ida husi rádiu analog ba rádiu dijitál.

“Lansamentu ida ne’e hanesan orgullu boot ida ba ami rádiu komunidade, ami konsidera ida-ne’e hanesan naha todan ida, tanba ami sei halo live streaming atu fahe informasaun ba ema hotu iha Timór no mundu,” Nascimento Profincial hateten.

Nia husu ba SEKOMS ho CI atu kontinua fó nafatin apoiu ba rádiu komunidade sira hotu. Tanba lansamentu programa ne’e presiza aumenta tan fasilidade serbisu hodi ekipa rádiu sira dezenvolve serbisu ho di’ak liután

Fatin hasan, Adjuntu Administradór Munisípiu Liquiça, Renato Nunes Serão, apresia ho lansamentu ne’e hodi rádiu idak-idak bele dezenvolve informasaun iha kada munisípiu.

“Programa ida-ne’e bele lori tan rádiu hakat ba oin lori progresu ba dezenvolvimentu,” Renato Nunes Serão hateten.

Nia husu ba jornalista rádiu komunidade sira atu ativu hala’o sira-nia serbisu hodi bele rekolla informasaun hotu-hotu atu hatutan ba povu no estadu ho  informasaun   kualidade.

Renato Nunes Serão hatutan, ohin loron serbisu mídia iha Timor-Leste importante, tanba jornalista no instituisaun mídia divulga informasaun ho independente, neutru hodi públiku bele konsumu informasaun loloos hodi halakon informasaun falsu ka hoax.

Nia husu mós ba komunidade atu kontinua koopera ho mídia hodi fahe informasaun hotu-hotu ne’ebé akontese iha sosiedade nia-leet.

Oportunidade ne’e, Prezidente Konsellu Imprensa (C), Virgílio Guterres hato’o parabéns ba Governu no rádiu komunidade sira ne’ebé iha inisiativa di’ak hodi lansa sítiu eletrónika  inklui bele halo live streaming.

“Hato’o ami nia parabéns ba pasu ne’ebé rádiu komunidade sira hakat, ho hanoin ida katak, ita hakat ba era-dijitál, maibé prezensa  ida-ne’e labele halakon rádiu analog. Tanba rádiu nia prezensa atu sai alternativa ba komunidade, tanba mídia boot sira ladún tau matan ba komunidade sira, tanba rádiu komunidade maka fó lian ba povu hodi haforsa liután papél rádiu komunidade hodi sai alternativa ba povu liu-liu kona-ba informasaun,” Virgílio hateten.

Prezidente CI hatutan, mezmu rádiu bele tama dijitalizasaun, maibé povu balun ninia asesu kapasidade sei analog, tanba sei uza rádiu analog no povu barak sei uza iha área rurál sira.

“Konsellu Imprensa sei kontinua fó nafatin apoiu ba rádiu komunidade sira, liu-liu haree sira nia prosesu atu asesu ba Karteira Profisionál,” Virgílio tenik.

Nia  husu atu jornalista rádiu komunidade sira labele sai fontes ba lia-anin ka lia-bosok, tanba notísia falsu ohin-loron nia velosidade lansa maka’as tebes iha média sosiál sira.

“Rádiu komunidade tenke kombate hoax, atu nune’e, ita nia povu bele rona informasaun loos hodi hasa’e sira nia konfiansa ba ita nia serbisu,”  Virgílio afirma tan.

Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here