Prezidente Komisaun Funsaun Públika, Fautino Cardoso .Imajen/Antonio Goncalves

DILI, 28 maiu 2020 (TATOLI)–Primeiru-Ministru Taur Matan Ruak, ohin, fó pose ba Prezidente Komisaun Funsaun Públika Faustino Cardoso Gomes no fó konfiansa ba nia atu lidera Komisaun Funsaun Públika ba períodu tinan lima mai.

Prezidente Komisaun Funsaun Públiku (KFP), Faustino Cardoso Gomes, hateten komisáriu KFP seidauk kompleta foin mak na’in tolu no sei hein na’in rua seluk iha Parlamentu Nasionál (PN), tanba ne’e sei hein bainhira Primeiru-Ministru fó pose mak foin hahú hanoin oinsá planu ba oin.

“Maibé imi hotu hatene katak ami sira ne’e la’ós foun maibé ami maioria ema tuan ona no oinsá lalaok iha ne’ebá hanesan mota kuak, foho lolon, aitarak saida de’it ne’e ami hatene ona iha Komisaun Funsaun Públiku. Maibé ne’e hanesan iha vantajen ba iha mandatu datoluk ne’e,” dehan Prezidenti Komisaun Funsaun Públika, Faustino Cardoso Gomes, ba jornalista sira hafoin simu tomada pose hosi Primeiru-Ministru Taur Matan Ruak iha Palásiu Governu, Dili, kinta ne’e.

Nia hatutan, ho tomada pose hamutuk ho komisaria na’in-rua Carmeneza dos Santos Monteiro no Maria de Jesus Sarmento ne’e sei iha biban hodi Prezidente KFP ho nia komisáriu/a sira bele hanoin oinsá mak atu kontinua servisu hodi hala’o programa Governu nian.

“Tanba ne’e sei fó biban mai ami atu tuur hamutuk hodi fila hikas buat saida-saida mak hala’o ona iha pasadu no oinsá ba oin haree nia kontinuidade. Buat foun sira ne’ebé presiza inkorpora ka hatama hikas bazeia ba espetativa orientasaun hosi Governu ne’ebé liga ho polítika no programa Governu ninian,” nia akresenta.

Tanba ne’e, nia hato’o agradese ba Primeiru-Ministru ne’ebé fó konfiansa ba nia no komisariu/a sira atu serbi povu no nasaun tanba misaun ida-ne’e dezafiante tebes.

“Pesoálmente kontinua servisu hala’o knaar ne’ebé importante tebes. Misaun ida-ne’e dezafiante ne’ebé ligadu ho konjuntu polítiku maibé nafatin iha kompromísiu no otimizmu sei konkista susesu,” nia dehan.

Nia hateten, atu apoiu polítika programa Governu ninian, nia  sente haksolok tanba ekipa KPF ida-ne’e hatene malu nanis tiha ona no iha konesementu di’ak kona-ba servisu funsaun públiku nian.

Iha oporturnidade ida ne’e, nia dehan, ho kbiit no matenek tomak sei apoiu nafatin polítiku atu oinsá komisaun funsaun públika ne’e bele la’o ho di’ak hodi hatán ba espetativa funsaun públiku asegura ba seguransa no inspirasaun funsionáriu públiku no realizasaun polítika Governu ninian.

Nia esplika, KFP hala’o servisu kona-ba jestaun rekursu umanu no setór públiku maibé knaar ida-ne’e knaar Primeiru-Ministru nian nu’udar Xefe Governu, iha ámbitu reforma atu asegura efikásia, kontinuidade, efisiénsia funsionamentu mak mosu KFP ne’e.

“Iha tutela direita hosi Primeiru-Ministru tanba ne’e ba oin ami kompromete ba oin nafatin komunikasaun no prontu rona orientasaun hosi Primeiru-Ministru kona-ba lalaok Komisaun Funsaun Públika nian. Nune’e mós funsaun públika enjerál tuir valores no prinsípiu sira ne’ebé sustenta funsionamentu funsaun públika ne’e rasik. Ita hatene katak mandatu konstituisaun dehan funsaun públika ne’e nia substansia nuklear ne’e mak funsaun públika rasik kompostu hosi ema sira ne’ebé fó dinamizasaun ba lalaok Estadu nian,” nia esplika.

Tanba ne’e, tuir nia, prinsípiu ne’ebé iha katak oinsá mak servisu sira ne’e desentraliza, deskonsentra nune’e sira prontu atu halo komunikasaun ho membru Governu sira iha ámbitu atu halo oinsá tuir kompromisiu konstitusional ida-ne’e.

“Ha’u tinan lima iha KFP dirije orgaun kolejiál ida hanesan esperiénsia iha CNE nian. Maske tempu ho ambiente ne’ebé lanhanesan, ha’u sente bainhira ha’u iha KFP buat barak mak ami konsege hala’o iha ámbitu dinamizasaun ba funsaun públika. Hatán mós ba espetativa funsionáriu sira atu oinsá hasa’e sira-nia motivasaun no servisu di’ak ba povu no ba rai lulik ida ne’e,” nia dehan.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here