Diretór Jerál Ministeriu Soliedariedade Sosial no Inkluzaun (MSSI), Rui Manuel Gago Exposto. Imajen/Nelson Sousa

DILI, 27 maiu 2020 (TATOLI)-Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten to’o tersa (26/05/2020) ne’e, Governu seidauk deside orariu pagamentu subsídiu ba família uma-kain sira ho valór $ 100 iha territóriu Timor-Leste.

“Agora sei iha hela prosesu nia laran ita labele fó sai lai data loloos tanba ne’e ha’u husu ba públiku atu kalma ita hein atu bele implementa pagamentu ne’e ba fulan rua nian,” katak nia ba Jornalista sira iha edifísiu Ministériu Finansa, Ai-Tarak-Laran Dili, tersa ne’e.

Tuir planu prosesu pagamentu sei realiza depois Ministériu Finansa halo ona tranferénsia orsamentu ba konta bankaria suku hamutuk 452.

“Pagamentu ami tenta para iha loron 10 nian laran de’it, maibé ita sei haree mós ba dezastre naturál ne’ebé mak akontese dalan balu kotu. Entaun buat sira ne’e ita tenta mós atu haree. Governu nafatin komprometidu pagamentu halo iha maiu ne’e maibé ita sei haree situasaun hotu,” nia esplika tan.

Tuir dadus husi Ministériu Administrasaun Estatál total família uma kain 330.000 maka sei sai benefisiáriu ba subsídiu Governu ne’e, maibé hafoin halo verifikasaun númeru ne’e tuun ona ba 326.000.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here