Prezidente Partido Democrático (PD), Mariano "Asanami" Sabino. Imajen/Antonio Goncalves

DILI, 27 maiu 2020 (TATOLI)—Prezidente Partidu Demokrátiku (PD), Mariano “Assanami” Sabino, afirma sei apoia kualkér Governu ne’ebé forma Aliansa Maioria Parlamentár, basá iha karta ne’ebé nia hakerek no dirize ho respeita no hakuak boot ba Prezidente Partidu CNRT, Kay Rala Xanana Gusmão, katak PD hakarak aselera dezenvolvimentu nasionál.

“Tanba iha ona konjuntura polítika foun ida-ne’e maka PD sei apoiu ba kualkér governu ne’ebé forma hosi maioria parlamentár, nune’e bele aselera dezenvolvimentu nasionál no konstrusaun estadu no nasaun. Mak ne’e de’it, ami hato’o ami-nia respeita tomak no hakuak boot ba Maun Boot Kay Rala Xanana Gusmão,” Assamai hakerek iha karta ne’ebé dirize ba Prezidente CNRT, Kay Rala Xanana Gusmão, liuhosi komunikadu imprensa ne’ebé Agência TATOLI asesu, kuarta ne’e.

Tuir komunikadu imprensa ne’e, Prezidente Partidu Demokrátiku (PD), Mariano Assanami Sabino haruka karta ba Prezidente Koligasaun Foun atuál Prezidente CNRT, Kay Rala Xanana Gusmão ho númeru referénsia 28/V/Pres. PD/2020, ho asuntu pozisaun PD nian kona-ba koligasaun ho partidu Neen (6).

Assanami esplika iha karta ne’e, koligasaun entre partidu polítiku ne’ebé PD hola-parte, nu’udar meiu ida atu viabiliza governasaun ida-ne’e maka liuhosi konferénsia nasionál, ne’ebé halo iha loron 20 fulan-fevereiru 2020, PD deside hodi hola-parte iha koligasaun entre partidu CNRT, KHUNT, PD, UDT, FM no PUDD.

Partidu Neen (6) kompostu hosi CNRT, KHUNTO, PD, UDT, FM no PUDD asina akta koligasaun iha loron sábadu (22/2/2020), iha sede CNRT, Bairro dos Grilhos, Dili.

Akta ne’e asina hosi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta, dos Santos, Prezidente En-Ezersísiu UDT, Rodolfo Aparício Guterres, Prezidente En-Ezersísiu Frente-Mudansa (FM), Egídio de Jesus no Prezidente PUDD, António de Sá Benevides.

Maske nune’e, iha loron 29 fulan-abríl 2020, KHUNTO deklara sai hosi koligasaun ho razaun atu mantein apoia ba VIII Governu Konstitusionál.

Prezidente PD ne’e haktuir, iha loron 19 fulan-maiu 2020, Tribunál Rekursu hasai desizaun kona-ba retirada KHUNTO hosi koligasaun foun entre partidu neen (6) hodi dehan “julga-se não constituída a coligação “Aliança Maioria Parlamentar” ka koligasaun AMP la prinxe ona maioria parlamentár hodi forma IX Governu Konstitusionál.

Assanami argumenta, ho desizaun partidu KHUNTO no Tribunál Rekursu ne’e mak halo mudansa ba konjuntura polítika hodi afeta ba ezisténsia koligasaun nian. PD ba Estadu, nune’e PD hakarak kontribui nafatin ba konstrusaun estadu no nasaun, liuliu dalan pasífiku hodi garante nafatin unidade, pás, demokrasia no estabilidade ba Timor-Leste.

Jornalista : Evaristo Soares Martins

Editór         : Cancio Ximenes

HAKEREK NO HATÁN

Please enter your comment!
Please enter your name here