Sekretáriu Estadu Juventude no Desportu, Nelio Isaac Sarmento

DILI, 26 maiu 2020 (TATOLI)-Sekretáriu Estadu Juventude no Desportu (SEJD) Nelio Isaac Sarmento, segunda (25/05/2020) halo ona serimonia despedida ho ninia funsionáriu hahú husi Diretór Jerál, Diretór Nasionál no kargu xefia seluk tan hodi retira husi estrutura Governu Konstitusionál Daualuk.

Eis Sekretáriu Estadu Komunikasaun Sosiál ne’e hatama ona ninia karta rejignasaun ba Primeiru-Ministru, Taur Matan Ruak, iha segunda ne’e hodi kumpre orientasaun partidu CNRT nian maka tenki retira husi Governu Daualuk ne’ebé lideradu husi Taur Matan Ruak.

“Atan ha’u agradese ba apoiu tomak Primeiru-Ministru nian mai ha’u durante asume kargu nu’udar Sekretáriu Estadu Juventude no Desportu. Nu’udar líder ne’ebé estadista ho pasiensia no haraik an, inspira ha’u hodi ajuda servisu tomak,” dehan Nelio ba TATOLI via Mídia Sosiál Facebook, ohin.

Atu dezenvolve nasaun ne’e bá-oin, nia dehan presiza ema hotu nia kontribuisaun, maibé tanba dinámika polítika iha rai-laran maka nia deside tenki rezigna husi ninia kargu tanba kumpre ierárkia Partidu CNRT.

“Atu apoiu dezenvolvimentu ba ita-nia rain, maibé iha momentu ida ho situasaun polítika hanesan oras ne’e daudaun, ha’u tenki deside posizaun polítika ha’u-nian, tuir ba polítika partidu nian ne’ebé indijita ha’u,” tenik Nelio.

Governante ne’e hatutan sei entrega relatóriu servisu durante tinan rua nian ba Sekretáriu Estadu Juventude no Desportu foun.

“Oras ne’e ha’u la halo ona desizaun ba kargu ne’ebé ha’u asume, maibé akompaña de’it hodi hein membru governu foun,” reforsa Governante ne’e.

Entretantu, Nelio Isaac Sarmento hetan fiar husi partidu Congresso Nacional da Reconstrução de Timor (CNRT-sigla portugés) ne’ebé lideradu hosi Kay Rala Xanana Gusmão, hodi asume pasta SEJD no simu pose husi Prezidente Repúblika, Francisco Guterres Lú Olo iha loron 22 fulan-jullu 2018.

Jornalista   : Hortencio Sanchez

Editór         : Agapito dos Santos

HAKEREK NO HATÁN

Please enter your comment!
Please enter your name here