Bebé foin moris. Ilustrasaun

DILI, 25 maiu 2020 (TATOLI)-Xefe Gabinete Kontrolu Kualidade, Ospitál Nasionál Guido Valadares (HNGV-sigla portugés), Sara Maria Xaviér, relata inan isin-rua hamutuk 1.931 maka partu durante fulan-lima hahú janeiru to’o meadu maiu 2020.

Durante fulan lima ne’e total inan mak halo internamentu hamutuk 2002, maibé sira ne’ebé maka partu hamutuk 1931, partu normal 1.442, partu ho meiu sesariana hamutuk 367.

”Depois inan sira ne’ebé mak partu liuhusi partu ventoza ne’e hamutuk 122 no inan sira ne’ebé mak partu ho bebe nia kondisaun normál 55,” informa Nia ba jornalista sira iha HNGV, segunda (25/05/2020).

Husi totál inan isin-rua ne’ebé maka partu, rejista na’in tolu mate, na’in ida mate durante fulan-janeiru, na’in ida iha marsu no ida seluk mate iha fulan-abríl tanba kauza husi hemorajia no mós hipertensaun durante grávidez.

No bebe sira ne’ebé maka mate iha inan-nia kabun laran hamutuk 37.

”Ita haree situasaun ne’e inan barak mak mai partu iha HNGV maibé tuir loloos ne’e HNGV simu mak inan sira ne’ebé mak iha komplikadu,”katak Sara.

Ba kazu partu normal sira, nia rekomenda atu partu iha Sentru Saúde sira tanba iha ekipamentu no profisionál saúde treinadu hodi atende pasiente sira.

“Realidade inan sira barak mai partu iha HNGV entaun ita kompara númeru ne’e ho tinan kotuk númeru agora daudaun boot liu,” tenik Xefe Gabinete Kontrolu Kualidade Sara Maria Xavier.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here