Ministru Negósiu Estranjeiru no Kooperasaun, Dionísio da Costa Babo Soares. Imajen/Egas Cristóvão

DILI, 25 maiu 2020 (TATOLI)-Ministru Negósiu Estranjeiru no Kooperasaun (MNEK), Dionísio da Costa Babo Soares, segunda ne’e hatama ona karta rezignasaun ba Primeiru-Ministru, Taur Matan Ruak hodi retira husi estrutura Governu Konstitusionál daualuk.

Babo foti desizaun ne’e bazeia ba orientasaun husi Partidu Congresso Nacional de Reconstrução de Timor (CNRT-sigla Portugés) hodi sai husi estrutura Governasaun Daualuk ne’ebé lidera husi Taur Matan Ruak.

Ministra Finansa ein ezersísiu, Sara Lobo Brites. Imajen Tatoli/Egas Cristovão

Maibé, Ministra Finansa en ezersísiu, Sara Lobo Brités, ne’ebé antes ne’e indijitadu husi Partidu CNRT hodi asume kargu ne’e deside hodi mantein servisu iha estrutura Governu Daualuk.

“Ita hatene katak, dinámika polítika iha rai-laran hanesan prosesu demokrátiku ida akontese CNRT deside tiha ona atu retira hosi Governu. Ho respeitu tomak ohin dadeer ami mai hasoru Primeiru-Ministru atu fó hatene desizaun partidu liuliu kuadru importante hanesan ha’u ohin hato’o ha’u nia rezignasaun,” dehan Ministru Negósiu Estranjeiru no Kooperasaun, Dionísio da Costa Babo Soares ba jornalista iha Palásiu Governu hafoin entrega karta rezignasaun ba Primeiru-Ministru, Taur Matan Ruak, ohin.

Nia informa, Xefe Governu lamenta ho desizaun ne’e, maibé kestaun polítika tenke submete ba desizaun ierárkia.

“Ami hatete ba Primeiru-Ministru lala’ok polítika mak hanesan ne’e. Ami la’o no respeita desizaun partidu nian. Nune’e, Primeiru Ministru husu tuir konstituisaun depois hatama tiha karta rezignasaun atu demite, Primeiru-Ministru sei halo despaisu para ami bele hetan ezonerasaun formál tuir konstituisaun,” tenik Babo.

Kona-ba membru Governu sira seluk husi partidu CNRT hatama ona karta rezignasaun ka seidauk, Dionísio Babo Soares lakohi komenta asuntu ne’e.

“Ha’u labele ko’alia ba ministru seluk nia naran, ha’u ko’alia ba ha’u-nia an no ba desizaun koletiva partidu ninian. Tuir desizaun membru hotu komesa ohin bá-oin hato’o ona karta rezignasaun, ha’u rasik hatama ona no membru seluk ha’u la hatene hatama ona ka lae,” nia dehan.

Governante ne’e husu ba ministru foun ne’ebé maka sei asume kargu Ministériu Negósiu Estranjeiru no Kooperasaun tuirmai tenki iha kontinuidade ba servisu balun ne’ebé maka antes ne’e halo ona.

“Iha polítika Governu ida tama, Governu ida sai. Membru Governu ida tama, ida sai. Importante mak tenke fó kontinuidade tanba ita hotu mai serbí povu la’ós ba ita-nia an rasik,” dehan Eis Ministru Administrasaun Estatál ne’e.

Iha sorin seluk, Ministra Finansa en ezersísiu, Sara Lobo Brites hateten, nia kontinua mantein relasiona ho servisu tékniku balun ne’ebé presiza atu halo.

“Ha’u servisu nafatin tanba haree ba ha’u-nia servisu iha Ministériu Finansa, servisu ne’ebé ha’u halo iha tékniku no operasionál ne’ebé ha’u deside mantein servisu nafatin,” afirma Sara Lobo Brites iha Palásiu Governu ohin.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here