Xanana hakuak inan-feton ida ho domin boot ba nia povu, domingu (24/05/2020). Imajen/Eugénio Pereira

DILI, 24 maiu 2020 (TATOLI) – Eis Primeiru-Ministru, Kay Rala Xanana Gusmão, promete sei buka apoiu hodi reabilita Eskuadra Polísia Becora, Postu Administrativu Kristu Rei, Munisípiu Dili.

Xanana observa Eskuadra Polísia Becora, Dili, domingu (24/05/2020). Imajen/Eugénio Pereira

Kompromisu Xanana nian ne’e hato’o  bainhira akompaña husi Segundu Komandante Polísia Eskuadra Becora, Asistente Inspetór Paulino de Carvalho, ba halo observasaun diretamente ba kondisaun edifísiu Eskuadra polísia Becora ne’ebé fizikamente nia uma-kakuluk at daudaun ona, fatin serbisu, sela detensaun, fatin investigasaun kriminál inklui kondisaun hariis-fatin kuaze aat hotu ona no bainhira tempu-udan bee tama habokon sala serbisu fatin sira.

Asistente Inspetór, Paulino de Carvalho, halo esplikasaun no hatudu diretamente kondisaun fatin serbisu presiza reabilita hodi apoiu serbisu polísia nian hodi asegura seguransa no atende abitante sira ne’ebé presiza polísia nia tulun.

Inspetór Paulino dehan, edifísiu ho andár rua ne’e kalén dodok hotu ona hodi halo plafond laran sira dodok monu ba rai inklui azuleju kuaze nakfera hotu ona.

“Ami agradese maun boot Xanana bele mai haree diretamente ami-nia kondisaun,” hateten Paulino.

Nia dehan, iha jardín oin rasik foin lalais akontese inundasaun, bee konsege tama no sira-nia parte husu apoiu ba governu konsege lori rai-henek hodi aterra iha fatin-ne’e.

Dezafiu seluk ne’ebé membru PNTL Becora enfrenta maka menus transporte no karreta Pajero ida ne’ebé uza halo operasaun ne’ebé daudaun ne’e aat no para de’it iha eskuadra oin.

Xanana triste haree kondisaun infra-estrutura Eskuadra Polísia Becora hodi promote sei buka halo reabilitasaun liu-liu hadi’a no troka kalén no plafond sira ne’ebé aat ona.

“Agora ha’u mai haree de’it, depois sira sei buka alternativa oinsá maka troka tiha kalén sira ne’ebé aat iha uma leten no hadi’a mós plafond sira ne’ebé aat,”  Xanana hateten.

Xanana sei buka apoiu hodi hadi’a Eskuadra Polísia refere tanba vizita haree fatin serbisu polísia nia barak maka hetan estragus.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here