MOP hadia ona estrada dirasaun Manatuto ba Natarbora. Imajen/Mídia-MOP

DILI, 23 maiu 2020 (TATOLI) – Governu liuhosi Ministériu Obra Públika  (MOP) normaliza hikas estrada koneksaun Manatuto ba Natarbora ne’ebé kotu tanba udan-boot no rai halai iha área Mane-Haat iha loron 21 no 22 maiu.

Normalizasaun ne’e hodi garante nafatin movimentasaun komunidade inklui transporte públiku no privadu.

Hafoin udan-boot hamosu inundasaun iha Munisípiu Lautém, Baucau, Viqueque, Manufahi no Covalima, Ministru Obra Públika, Salvador Eugênio Soares dos Reis Pires, orienta kedas Diresaun Jerál Obras Públika (DGOP) no Institutu Jestaun Ekipamentu (IGE, sigla portugés) hodi halo atendimentu emerjénsia iha área ne’ebé hetan estragu kauza hosi udan-boot.

“Dadaun ne’e, ekipamentu pezadu IGE nian destaka ona iha Kosta Súl no parte Leste hodi halo atendimentu emerjénsia hodi normaliza konektividade ba movimentasaun komunidade nian no transporte sira,” refere nota imprensa ne’ebé Agência Tatoli asesu iha portál ezekutivu, sábadu ne’e.

Iha sesta (22/05), Ministru Salvador realiza enkontru ho Diretór Jerál Obra Públika, Rui Hernani, atu tau atensaun ba manutensaun estrada iha kapitál ne’ebé hala’o husi kompañia sira hodi garante kualidade ne’ebé di’ak.

MOP liuhosi DGOP sei halo levantamentu imediata ba estragu iha Munisípiu Covalima, Manufahi, Manatuto, Viqueque, Lautém no iha munisípiu seluk.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here