Lagoa Ira-Lalaro, área Malahara, Suku Muapitene, Postu Administrativu Lospalos, Munisípiu Lautém. Imajen/Espesiál

DILI, 23 maiu 2020 (TATOLI) – Lafaek tata mate Banifaçio Sanches ho idade 27 bainhira ba kail ikan iha lagoa Ira-Lalaro, área Malahara, Suku Muapitene, Postu Administrativu Lospalos, Munisípiu Lautém.

Matebian nian Kolega, Olderito de Jesus informa lafaek tata mate nia kolega iha tuku 11:30 dader, bainhira matebian hamriik iha bee laran, lagoa Ira-Lalaro hodi kail ikan.

“Ami ba kail ikan hotu, maibé ami la la’o hamutuk tanba nia husi Home ba lagoa Ira-Lalaro ne’e dader kedan. Matebian hamkriik besik liu nia tiu ida no derepente lafaek mosu no tata kedan nian kabun, hafoin lori kedan nia ba bee laran”, tenik Olderito ba ba Agência Tatoli, sábadu ne’e.

Matebian ho naran bolu Rony, hanesan ema kaben-na’in ona ho oan na’in-ida, husi Aldeia Rei-Soru, Suku Home, Postu Administrativu Lospalos, Munisípiu Lautém.

Hafoin lafaek tata mate, nia dehan Komunidade husi Aldeia Malahara no Mehara inklui komunidade balun ne’ebé ba kail iha lagoa Ira-Lalaro esforsu hodi buka maibé seidauk hetan tanba lafaek lori kedan mate isin ne’e ba bee klaran.

“Ami ohin hein to’o kalan, maibé lafaek seidauk husik matabian nia mate isin no ami haree lafaek sei tata metin. Tanba ne’e ami tauk tama ba bee laran”, dehan matebian nia kolega ho triste.

Tuir Olderito, Polísia inklui Veteranu balun iha Munisípiu Lautém koko atu tiru lafaek ne’ebé tata matebian ne’e, maibé la konsege kona.

“Membru Polísia Nasionál Timor-Leste hamutuk ho komunidade balun sei kontinua hein matebian nia isin iha lagoa Ira-Lalaro no aban maka sei kontinua buka fali”, nia nia adianta.

Olderito salienta, to’o agora família seidauk hetan matebian nian isin tanba lafaek sei tata metin iha bee laran, ho nune’e membru Polísia balun sei kontinua hein iha hodi aban (25/05), atu kontinua buka fali.

“Ita espera atu lafaek bele lori matebian nia isin mai iha rai-maran atu lori ba uma tuir prosesu fúnebre kultura nian”, nia akresenta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here