Prezeidente PN, Aniceto Longuinhos Guteres Lopez. Imajen /Egas Cristóvão

DILI, 22 maiu 2020 (TATOLI)— Prezidente Parlamentu Nasionál, Aniceto Guterres, hateten vise-prezidente na’in-rua sei mantein maibé sei halo mudansa [troka] mak sekretária meza, vise-sekretária no prezidente komisaun espesializada sira.

Aniceto Guterres, ko’alia asuntu ne’e relasiona ho konfigurasaun polítika foun entre partidu Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) hodi kontinua viabiliza VIII Governu Konstitusionál.

“Entendimentu Entre FRETILIN, PLP no KHUNTO hakarak altera hotu ba sekretária meza no vise-sekretária. Tuir saida mak ha’u hatene vise-prezidente na’in-rua sei mantein. Agora atu halo alterasaun ba sekretária no vise-sekretária sira. Ha’u tau tiha ona ajenda maibé depende bankada parlamentár sira. Próxima semana bele halo,” dehan Aniceto Guterres ba jornalista sira iha resintu Parlamentu Nasionál, sesta ne’e.

Purtantu Kompozisaun Meza antes ne’e mak Prezidente Parlamentu Nasionál, Arão Noé de Jesus da Costa Amaral, hosi CNRT maibé oras ne’e mudansa ona, Vise-Prezidente Parlamentu Nasionál, Maria Angelina Sarmento Lopez hosi PLP (mantein), Segundu Vise PN, Luis Roberto hosi KHUNTO (mantein).

Aniceto Guterres dehan, halo mudansa Sekretária Meza PN, Maria Terezinha Viegas hosi CNRT no Vise-Sekretária PN, Isabel Maria Barreto Freitas Ximenes hosi Bankada UDT/FM, no Segundu Vise-Sekretária, Regina Freitas hosi PLP (posibilidade mantein).

“Tanba iha ona mudansa ba konfigurasaun polítiku foun, maioria ida bele iha entendimentu ida para iha alterasaun ba iha meza komisaun ne’ebé agora eziste. Bele iha mudansa maibé depende ba entendimentu maioria parlamentár,” nia dehan.

Komisaun Espesializa sira iha Parlamentu Nasionál mak hanesan Komisaun A (Justisa no Konstitusionál) oras ne’e sei lideradu Carmelita Caetano Moniz hosi CNRT, Prezidente Komisaun B (Negósiu Estranjeiru, Defeza no Seguransa) lideradu Adérito Hugo da Costa, Komisaun C (Finansa Públika) lideradu Maria Fernanda Lay hosi CNRT.

Nune’e mós Komisaun D (Ekonomia no Dezenvolvimentu) lideradu Virgínia Ana Belo hosi CNRT, Komisaun E (Infraestrutura) lideradu Abel Pires hosi PLP, Komisaun F (Saúde, Seguransa Sosiál no Igualdade Jéneru ) lideradu Maria Barreto hosi CNRT no Komisaun G (Edukasaun, Juventude, Kultura no Sidadania) lideradu Sabino Soares “Guntur” hosi PLP.

“Komisaun idak-idak bele reúne hodi halo alterasaun ba sira-nia meza komisaun nian tanba iha komisaun nia laran iha reprezentasaun hosi bankada hotu-hotu. Ha’u seidauk simu bankada tolu nia konsensu ba meza komisaun nian,” nia hateten.

Prezidente Parlamentu Nasionál ne’e hein hela konsensu entre FRETILIN, PLP no KHUNTO kona-ba mudansa ba sekretária meza, vise-sekretária meza no prezidente komisaun espesializada sira.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here