Primeiru-Ministru, Taur Matan Ruak. Imajen/ Egas Cristovao

DILI, 21 maiu 2020 (TATOLI)–Tuir planu, ohin, Konsellu Ministru sei halo kalendarizasaun ba aprezentasaun Orsamentu Jerál Estadu (OJE) tinan 2020 no tinan 2021 ba Parlamentu Nasionál.

Planu ne’e, Primeiru-Ministru (PM) Taur Matan Ruak hato’o ona ba Prezidente Repúblika (PR), Francisco Guterres “Lú Olo”, durante enkontru semanál iha Palasiu Prezidensiál Nicolau Lobato  Bairu Pité, Dili.

“Informa ba Prezidente Repúblika katak, orsida lorokraik sei iha reuniaun Konsellu Ministru ne’ebé sei deside kona-ba kalendáriu orsamentál tinan 2020 no 2021,” Taur hateten ba jornalista sira hafoin enkontru ho Prezidente Repúblika, kinta ne’e.

Xefe governu ne’e dehan, nasaun labele kontinua funsiona ho baze duodésimu, tanba ne’e ho re-estabelesimentu normalidade iha Parlaementu Nasionál, Governu sei aprezenta Orsamentu Jerál Estadu ba tinan 2020 no 2021.

Antes ne’e, liuhosi mensajen ofisiál ba komemorasaun restaurasaun independénsia ba dala-18, Prezidente Repúblika Francisco Guterres “Lú Olo”fiar katak Governu prepara ona OJE 2020 no 2021 hodi rekupera hikas ekonomia rai laran.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here