Vise Primeiru-Ministru Asuntu Solidariedade Sosiál no Inkluzaun, Armanda Berta dos Santos. Imajen /Egas Cristovão

DILI, 21 maiu 2020 (TATOLI)–Governu liuhosi Ministra Solidaridade Sosiál no Inkluzaun (MSSI), Armanda Berta dos Santos, hateten Governu labele promote katak bainhira mak fahe subsídiu tanba dadus sira ne’e sei iha faze preparasaun nian.

“Ita sei prepara dadus hotu mak bele fahe. Maibé ita la promete bainhira mak fahe tanba ita-nia tékniku sira sei servisu hela iha faze preparasaun ba dadus. Mezmu kleur maibé iha fulan maiu ita sei fahe ona,” dehan Armanda Berta dos Santos ba jornalista sira iha Ministériu Finansas (MF), Aitarak Laran, Dili, kinta ne’e.

Entretantu, Diretór Jerál Ministériu Solidaridade Sosiál no Inkluzaun (MSSI), Rui Manuel Gago Expostu informa, dadus atuál ba uma-kain sira ne’ebé mak atu halo pagamentu subsídiu $100 purvolta uma-kain 310.187.

“Dadus pagamentu purvolta 310.187 mak aban MSSI sei entrega ba Ministériu Finansas  depois bele prosesa ona,” dehan Rui Manuel Gago Expostu.

Diretór Jerál MSSI hatutan, dadus subsídiu ba agregadus uma-kain ne’ebé MSSI halo validasaun mak hamutuk 312.725.

“Ami foin mak enkontru ho Konsellu Ministru no informa hela katak atualizasaun dadus ne’ebé ami simu hosi Ministériu Administrasaun Estatal (MAE) hamutuk 323.643. Dadus ne’e bainhira tama mai iha MSSI mak MSSI halo validasaun ba dadus hamutuk 312.725,” nia dehan.

Hosi dadus hirak ne’e, nia hateten, mak sira halo kruza ba Seguransa Sosiál (SS) depois sira esklui tiha balu no oras ne’e hela 2.538 tanba sira-nia saláriu boot liu dolár 500 ba leten.

Tuir informasaun ne’ebé fó sai ona katak aban (sesta, 22 maiu 2020) halo ona pagamentu subsidiu, Diretór Jerál MSSI hateten, informasaun kona-ba pagamentu subsídiu uma-kain ne’e tenke sai hosi MSSI.

Nia hateten, durante ne’e MAE mak konfundi sala maibé tuir loloos ne’e MSSI mak iha kompeténsia atu hato’o kalendáriu pagamentu ba subsídiu nian.

“Tanba ne’e, dala ida tan, ha’u hakarak dehan ba ita-boot sira katak MSSI mak iha kompeténsia atu fó sai informasaun kona-ba kalendáriu pagamentu subsidiu. MSSI-MAE iha liña koordenasaun kona ba subsidiu maibé parese MAE mak lahatene,” nia dehan.

Estadu Emerjénsia daruak sei termina iha loron 26 maiu maibé subsidiu seidauk fahe, nia hateten, Estadu Emerjénsia mak termina ona maibé COVIDd-19 seidauk termina. Tanba ne’e, MSSI tenta iha fulan maiu nia laran tenke fahe ona subsidiu ba agregadus uma-kain.

“Ohin, ha’u mai aprezenta subsidiu ba fulan rua nian no pagamentu ami sei fahe kada aldeia nian. Maibé kona-ba kalendáriu pagamentu ne’e xefe suku mak halo, nune’e aldeia ida ne’ebé mak simu uluk no ida ne’ebé mak simu ikus,” Diretór ne’e hateten.

Tuir informasaun katak, ema ne’ebé mak iha saláriu $500 ba leten, ema ne’e sei lahetan subsidiu nune’e tékniku sira sei haree no sei ajusta hamutuk hafoin tama ba faze implementasaun nian.

Jornalista : Osória Marques

Editór      : Cancio Ximenes

2 KOMENTÁRIU

  1. Liga ho pandemia covid 19, tuir hau nia opiniaun katak maske covid 19 lakon ona maibe presisa lock down nafatin ba fronteira terestre, nabal no lalehan,.atu nunee bele prevene nafatin, se kuando sistema planu ida nebe hau mensiona.ona.ih leten hodi prevene transmisaun corona iha loron ikus, atu nunee bele hatudu ba mundo katak masje material no equipamentu menus ho maneira prevensaun bele salva.povu husi virus covid 19 iha ita nia nasaun, good look to goverment.Timor leste.

  2. Subsidio id covid 19 nian ne atu fahe ba afeitado covid19 sr k atu fahe ba sensus agricula ne mk tenki fahe subsidiu tuir uma kain dt dpois ema sr nb mk hela ih dili no nunka ba foho hetan tanto Ema nbe hari Uma kain,estudante no ema buka moris ih ne hetan subsidiu k lae..?iha foho mk fahe tuir uma kain ne normal tmba ita koalia ba Mai fasil Hela maibe ema barak mk hlo nia aktividade iha capital dili ne lolos hetan tmb sr lahalai ba foho.

HAKEREK NO HATÁN

Please enter your comment!
Please enter your name here