Diretór Ezekutivu FONGTIL, Daniel Santos do Carmo. Imajen/Cipriano Colo

DILI, 20 maiu 2020 (TATOLI) – Governu liuhosi reuniaun Konsellu Ministru estraordinária, iha loron 23 abríl aprova ona proposta ne’ebé aprezenta husi Ministra Solidaridade Sosiál no Inkluzaun, Armanda Berta dos Santos kona-ba apoiu monetáriu ba agregadu familiár sira durante períodu Estadu Emerjénsia ligadu ho surtu COVID-19 iha Timor-Leste.

Ema sira ne’ebé sei sai benefisiáriu maka agregadu familiár sira kompostu hosi pelumenuz sidadaun ida no rejista ona to’o Ioron 31 marsu 2020 iha Livru Rejistu ‘Uma Kain’ no iha família ne’e nia laran, nia elementu ida kada fulan no regulár simu osan la boot liu $500.

Relasiona ho loron fiksu atu halo pagamentu $100 ba kada uma-kain, to’o agora Governu seidauk pronunsia tanba sei kruza dadus entre Ministériu Administrasaun Estatál (MAE) no Diresaun Jerál Estatístika (DGE, sigla portugés) ne’ebé sei iha diferénsia.

Maski seidauk iha iha loron fiksu ba pagamentu, Diretór Ezekutivu Forum Organizasaun Naun Governamentál  Timor-Leste (FONGTIL), Daniel Santos do Carmo, hateten FONGTIL preparadu ona no sei koloka ninia membru ida-idak atu halo kotrolu pagamentu $100 ba kada uma-kain ne’ebé tuir informasaun sei akontese iha fulan-maiu nia laran.

“Ekipa ida sei destaka iha suku iha Timor-Leste tuir kbiit ne’ebé ami iha atu tau matan ba prosesu tomak distribuisaun subsídiu ne’e rasik”, dehan Daniel liuhosi konferénsia imprensa iha Salaun FONGTIL, Caicoli, kuarta ne’e.

Tuir Dirijente ne’e, ho membru Hamutuk 230  sufisiente atu halo monitorizasaun ba distribuisaun subsídiu bazeia ba Dekretu-Lei númeru 15/2020 ba kada uma-kain.

Membru hirak ne’e sei destaka ba kada suku no FONGTIL mós iha rede nasionál lubuk ida, nune’e mós iha munisípiu 12 inklui Rejiaun Administrativa Espesiál Oé-cusse Ambeno (RAEOA).

Organizasaun Sosiedade Sivíl ne’e rasik hetan ona informasaun integradu husi Ministériu Solidaridade Sosiál  no Inkluzaun (MSSI) katak osan subsídiu sei transfere ba konta xefe suku nian, hafoin Banku Nasionál Komérsiu Timor-Leste (BNCTL, sigla portugés) sei transporta osan ne’e to’o postu no ekipa ne’ebé halo pagamentu sei foti osan iha postu no lori ba suku hodi distribui.

“Ami iha preokupasaun ba seguransa osan ne’e rasik no ekipa ne’ebé atu halo pagamentu, karik ita lakohi sira atu komete irregularidade ruma hodi uza sala osan ne’e maka ita antisipa. Tanba ne’e ami sei destaka ami-nia ema atu halo monitorizasaun ba suku sira atu garantia katak prosesu distribuisaun subsídiu ne’e iha duni trasparánsia akontável”, nia akresenta.

Tuir Daniel, sosiadade sivíl sira hakarak kontribui uza meiu destakamentu membru sira iha fatin pagamentu atu evita irregularidade.

“Ita alerta ba públiku katak FONGTIL ho ninia membru sira sei halo monitorizasaun ba prosesu pagamentu iha suku hotu iha Timór laran tomak”, nia salienta.

Kuandu iha irregularidade mosu durante distribuisaun subsídiu sira ne’e, FONGTIL sei  submete ba institusaun relevante hanesan Provedoria Direitu Ema no Justisa (PDHJ, sigla portugés) inklui Komisaun Antí Korrupsaun (KAK) hodi loke investigasaun.

Biban ne’e, Diretór FONGTIL apresia servisu MSSI ho ninia padraun rasik ne’ebé aplika ba distribuisaun subsídiu ne’e tanba iha parte ne’ebé simu krítika husi públiku relasiona ho prosesu pagamentu no fó oportunidade ba sosiedade sivíl atu halo monotorizasaun.

“Ami sei halo akordu ida ho MSSI atu nune’e fó biban ba FONGTIL ho ninia membru sira karik biban durante prosesu pagamentu maka akontese buat ruma ami bele hase tuir baze legál, nune’e osamentu ne’ebé distribui ba povu bele tuir nia dalan”, nia subliña.

Biban ne’e, FONGTIL apela ba komunidade labele fó osan ba xefe suku sira tanba de’it halo ona viza família, tanba bainhira akontese komunidade sira promove korupsaun.

“Ne’e imi-nia direitu, nein atu fó lima sentavu nein atu fó 10 ka 50 sentavus ba xefe suku ka ba xefe aldeia, tantu pesoál apoia administrasaun suku, nune’e mós ba ekipa pagamentu sira”, nia akresenta.

Daniel informa, FONGTIL mós sei husu dadus ba MSSI atu fó funsionáriu ho saláriu $500, labele simu ona subsídiu ne’ebé Governu fó.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here