Padre Domingos Maubere dada lia ho jornalista sira bainhira observa situasaun atuál iha resintu Parlamentu Nasionál, tersa (19/05). Imajen Tatoli/Egas Cristovão

DILI, 19 maiu 2020 (TATOLI) – Padre Domingos Maubere, sente triste no fuan kanek haree no rona reprezentante povu sira iha Uma Fukun hatudu atitude hadau malu kadeira la ho edukativu no la tuir dalan konstitusionál.

Nia dehan, objetivu nia parte mai Parlamentu Nasionál (PN) ho batina mutin hodi hato’o lamentasaun ba Deputadu sira ninia aktu.

“Ha’u mai iha Parlamentu Nasionál atu hatudu laran mukit no triste, hodi husu Deputadu sira atu hala’o no haree dalan tuir hodi solusiona problema la’ós ita ba hakilar malu hanesan iha futu-manu tanba ema hotu tenke hakruuk ba justisa. Ita iha liberdade atu diskute maibé diskute ho matenek tanba ita labele hatudu situasaun hanesan ne’e ba povu”, tenik Amu Maubere iha resintu Parlamentu, tersa ne’e.

Nia adianta, povu Timor-Leste kuandu haree aktu Deputadu sira iha  PN hanesan hatun dignidade Timor-Leste iha mundu.

“Ita haree impase polítika la’o durante tinan-tolu ona no dadaun ita iha situasaun pandemia globál no povu terus tan ita la mai reszolve povu nia terus, maibé ita mai hatudu tan atitude hanesan ne’e hodi aumenta tan povu nia terus”, Padre Maubere lamenta.

Tuir Amu ne’e, mundu no solidaridade internasionál sira haree no hamnasa aktu Deputadu sira nian, tanba aktu hirak ne’e konsidera hanesan labarik sira mak halimar polítika.

“Ha’u nu’udar sidadaun hamutuk ho povu ezije ba na’in-ulun sira atu rezolve no tuur hamutuk ho ulun malirin atu rezolve problema“, nia akresenta.

Iha Sorin seluk, Xefe Bankada Partidu Demokrátiku, Antonio da Conceição ‘Kalohan’, hateten  presiza duni konvoka reuniaun líder bankada hodi rezolve problema ne’e tanba aktu sira ne’ebé la’o durante loron rua-ne’e hatudu la edukativu ba sidadaun sira.

“Ita presiza solusiona problema ne’e liuhosi entendimentu ida husi parte balun ne’ebé eziji no parte balun defende ne’e, tenke hapara aktu líder bankada sira hodi tuur hamutuk no halo ajenda atu halo diskusaun tanba aktu ne’e ami mós sente arrependidu tanba la edukativu ona”, katak Kalohan hafoin hasoru Amu Maubere iha resintu Parlamentu oin.

Hafoin Amu Maubere tuur iha Parlamentu oin, Deputadu Bankada Fretilin, David Dias Ximenes ‘Mandati’ hasoru Amu hodi konvida tama sala plenáriu hodi akompaña direta situasaun atuál.

Jornalista: Florencio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here