DILI, 16 maiu 2020 (TATOLI)–Governu liuhosi Sentru Intergradu Jestaun Krize (CIGC, sigla portugés), ohin, atualiza dadus Kazu ativu COVID-19 iha Timor-Leste zero ne’ebé númeru kazu baixa laiha, númeru rekuperadu mantein ho na’in-28 (konfirmadu 24 + provavel 4) no mate mós seidauk iha.

Portavós Sentru Integradu Jestaun Krize, Odete Viegas, informa númeru akumulativu ne’ebé mak teste ona hamutuk ema na’in-1.346 no rezultadu laboratóriu ne’ebé mak hein hela mak na’in-467, no númeru kumulativu kazu konfirmadu na’in-24, kazu konfirmadu foun zero (0) no rezultadu laboratóriu negativu na’in-855, no Profisional Saùde na’in-11 submete ba kuarentena.

“To’o agora ita pasa tiha ona rekuperadu na’in-24 no kazu ba ohin loron ne’e zero. Iha Timor-Leste, kazu konfirmadu foun zero (0) no rezultadu laboratóriu negativu na’in-855 no Profisional Saùde ne’ebé submete ba kuarentena hamutuk na’in-11,” informa Odete Viegas liuhosi Konferénsia Imprensa iha Sentru Konvensaun Dili (CCD, sigla portugés), Merkadu Lama, Dili, sábadu ne’e.

Nia hatutan, dadus ba kuarentena no auto kuarentena hamutuk 53 no hosi kazu 53 ne’e, kazu konfinamentu obrigatóriu iha na’in-48 kompostu hosi munisípiu sira ema na’in-haat (4) no iha Dili hamutuk ema na’in-44.

Tuir nia, númeru auto konfinamentu hamutuk na’in-lima (5) no iha munisípiu laiha auto kuarentena. Nia informa, okupante ne’ebé pasa ka kumpre ona loron 14 hamutuk 2.238 kompostu hosi munisípiu 500 no iha Dili 1738, Timor-Leste to’o ohin loron laiha kazu foun no rekupera ona mak hamutuk 24.

Tanba ne’e, Portavós Sentru Integradu Jestaun Krize ne’e hodi Governu nia naran hato’o agradese ba Aman Maromak tanba hahú hosi janeiru to’o ohin loron, Timor-Leste iha de’it kazu pozitivu hamutuk ema na’in-24.

“Iha opurturnidade ida ne’e, hakarak agradese ba Aman Maromak tanba hahú kedas COVID-19 iha fulan janeiru to’o ohin loron, ita iha de’it kazu pozitivu hamutuk 24. Hosi númeru ne’e ema na’in 22 mak kazu importadu no na’in rua seluk mak professor Portugal sira iha Munisípiu Liquiça,” nia informa.

Entretantu, Sentru Integradu Jestaun Krize mós hato’o agradese ba Governu Timor-Leste ho komisaun interministeriál sira, Igreja nomós lidér istóriku Timor-Leste no komunidade tomak no mós ba parte front line ba COVID-19.

“Ita agradese ba Governu, Exelénsia Primeiru-Ministru, Taur Matan Ruak, komisaun interministeriál, Amu Bispu sira no mós lidér istóriku sira hanesan Maun Ramos Horta, Maun Xanana Gusmão no eis Vise Ministra Saùde, Crus Vermelha Timor Leste (CVTL) no komunidade sira hotu liuliu komunidade sira ne’ebé hela iha Vera Crus, família pasiente iha kuarentena no izolamentu,” nia dehan.

Ba susesu ne’ebé Timor-Leste hetan ne’e, nia lahaluha hato’o agrdese ba timoroan sira-nia servisu hamutuk no unidade entre Ministériu Saùde (MS), Governu, Organizasaun Mundiál Saùde (OMS), CIGC inklui mídia.

Tanba ne’e, nia apela ba komunidade sira kontinua hala’o regra ne’ebé Governu liuhosi MS no OMS fó sai katak fiar nafatin Governu ne’ebé agora lidera prosesu prevensaun no mitigasaun moras COVID-19 ne’e, kolabora no partisipa ho disiplina iha distansiamentu sosiál, distansiamentu fiziku, no ijiéne pesoál.

“Husu mós atu tuur hakmatek iha uma no sai de’it hosi uma bainhira presiza tebes duni no ba loos mai loos. Fase liman bebeik, liuliu bainhira tama iha fatin públiku, liman labele konaba inus, matan ho ibun bainhira seidauk fase, no mós uza máskara bainhira tama-sai ba iha fatin atendimentu públiku,” nia apela.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here