Xefe Bankada Partidu Demokrátiku (PD) no Atuál Portavóz Koligasaun Foun, António da Conceição ‘Kalohan'. Imajen /Egas Cristovão

DILI, 15 maiu 2020 (TATOLI)—Prezidente Koligasaun Foun atuál Prezidente Partidu Congresso Nacional da Reconstrução de Timor (CNRT), Kay Rala Xanana Gusmão, fó orientasaun ba Portavós Koligasun atuál Sekretáriu Jerál Partidu Demokrátiku (PD), António da Conceição ‘Kalohan’, hatama karta ida ba Prezidente Repúblika, Francisco Guterres ‘Lú Olo’, hodi husu pronunsiamentu ba destinu koligasaun foun ne’e.

“Ohin, bazeia ba orientasaun prezidente koligasaun no ha’u hanesan portavós ba entrega fali karta ida Prezidente Repúbika. Konteúdu karta husu de’it Prezidente Repúblika bele ko’alia netik buat ruma ka halo netik pronunsiamentu ba koligasaun foun ne’e, bele mós eskritu no bele mó verbál ba ami. Nune’e, koligasaun ida uluk bele hatene loloos katak koligasaun ne’e sei iha ka laiha ona,” dehan Kalohan liuhosi Konferénsia Imprensa, iha sala Bankada PD iha Parlamentu Nasionál, sesta ne’e.

Portavós ne’e hateten, karta refere informa ba Xefe Estadu kona-ba KHUNTO ne’ebé retira hosi koligasaun foun ne’e.

“Nune’e Prezidente Repúblika hatene katak KHUNTO hasees-aan hosi koligasaun ne’e maibé no rekezitu ne’ebé husu ami kompleta hotu ona kona-ba artigu 9 lei partidu polítiku nian,” nia dehan.

Iha karta ne’e, informa ba Xefe Governu katak, KHUNTO apoia nafatin VIII Governu Konstitusionál no koligasaun ne’ebé lidera hosi CNRT laiha problema ho pozisaun KHUNTO nian.

“Maibé koligasaun fó hanoin katak, se ba IX Governu ne’e tuir lei partidu polítiku ne’e labele halo koligasaun dala-rua. Se KHUNTO sai ona hodi mantein iha VIII Governu entaun koligasaun laiha problema ho ida-ne’e. Signifika koligasaun ida eziste ba IX Governu KHUNTO sei mantein hela iha laran ba IX Governu ninian maibé ba VIII Governu nian maka KHUNTO sees tanba hakarak apoia,” nia dehan.

Portavós ne’e hateten, koligasaun foun hein pronunsiamentu hosi xefe governu, nune’e partidu polítiku sira bele foti desizaun ba konfigurasaun polítika atuál.

Nia afirma, pozisaun KHUNTO nian hanesan politikamente maibé juridikamente seidauk bele tanba Prezidente KHUNTO Armanda Berta dos Santos ho ninia Sekretáriu Jerál mesak labele haruka surat cinta ida hodi fó hatene ba prezidente koligasaun, Kay Rala Xanana Gusmão hodi dehan “ami (KHUNTO) sees ona”.

Tanba tuir nia, prosesu atu integra ba koligasaun ida, partidu polítika sira tenke realiza liuhosi konferénsia ka kongresu ruma.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here