Mídia na’in sira rona esplikasaun husi Sekretáriu Estadu Komunikasaun Sosiál, Merício Juvinal dos Reis ‘Akara’, molok asina akordu. Imajen/Mídia SEKOMS

DILI, 15 maiu 2020 (TATOLI) – Sekretaria Estadu Komunikasaun Sosiál (SEKOMS) asina akordu ho dirijente mídia sira, atubele halo publisidade ne’ebé eduka sosiadade ba prevensaun COVID-19.

Sekretáriu Estadu Komunikasaun Sosiál, Merício Juvinal dos Reis ‘Akara’, informa entendimentu ne’e nu’udar parte ida husi akordu entre SEKOMS no mídia na’in sira ho objetivu atu apoia mídia sira atu asesu ba Fundu COVID-19 tuir proposta SEKOMS, nune’e mídia sira kontribui halo publisidade.

“Ohin asina akordu iha kontestu Governu fó apoiu orsamentu ba mídia sira atubele halo kampaña disemina informasaun kona-ba COVID-19 ba ita-nia sidadaun hotu”, dehan Sekretáriu Estadu Akara hafoin ramata seremónia asina akordu ho mídia-na’in sira  ne’ebé hala’o iha Salaun SEKOMS, Palásiu Governu, sesta ne’e.

Iha biban ne’e, governamte ne’e informa ba mídia na’in sira katak kampaña prevensaun COVID-19 iha konteksu Governu apoia mídia hotu, la’ós de’it ba mídia televizaun no jornál sira de’it maibé mídia plataforma hotu ne’ebé maka rejista ona iha Servisu Rejistu Verifikasaun Emprezariál (SERVE).

“Bazeia ba ida-ne’e, ha’u haruka ona ekipa  halo selesaun dokumentu. Espera semana oin kontinua apoia mídia sira ne’ebé maka seidauk konsege asina kontratu ho Governu”, nia akresenta.

Akorde ne’e nu’udar parte ida atu konsidera mídia hanesan pilár importante, liuliu iha situasaun emerjénsia ne’ebé akontese daudaun no oinsá mídia hotu bele disemina informasaun.

Mídia Neen Asina Akordu ho Governu

Sekretáriu Estadu informa, mídia neen maka asina ona kontratu ho Governu liuhosi SEKOMS atu asesu ba Fundu COVID-19 nian atu halo publisidade no disemina informasaun kona-ba COVID-19.

Mídia hirak ne’ebé halo entendimentu ho Governu maka STL, GMN TV, Timor-Post, Dili Post, Indepedente, no Bisnis Timor.

Daudaun ekipa SEKOMS haree no halo ona verifikasaun, nune’e mídia sira husi kualkér plataforma hanesan rádiu no mídia online sira bele hetan hotu oportunidade.

Iha semana oin, SEKOMS sei kontinua asina kontratu mídia na’in sira.

“Ha’u hakarak dehan ba ita bo’ot sira katak ita konsidera mídia hotu hanesan. Laiha hanoin atu halo anak emas ba mídia ida de’it no laiha hanoin atu apoia ba mídia ida de’it maibé polítika SEKOMS maka haree mídia hotu hanesan”, nia subliña.

Iha fatin hanesan, na’in ba Mídia Dili Post, Fernando da Silva, agredese Governu liuhosi SEKOMS ne’ebé apoia ona mídia sira.

“Iha situasaun difísil ha’u hanoin mídia hotu laiha rendimentu no Governu mosu ho sira nia programa apoia ba media hotu, tantu rádiu, televizaun, online no jornál. Ida-ne’e hanesan ajuda ne’ebé maka di’ak ba mídia oinsá ami bele selu ami nia traballadór sira no ba operasionál  nian”, nia adianta.

Enkuantu orsamentu ne’ebé maka SEKOMS prevee iha Fundu COVID-19 bazeia ba proposta maka por volta $207.750.

Orsamentu ne’e alokadu ba  kampaña sensibilizasaun mitigasaun ba medida Estadu Emerjénsia inklui prevensaun no mitigasaun ba COVID-19.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here