Prezidente Autoridade RAEOA-ZEESM vizita orfanatu Topu Honis. Imajen/Mídia RAEOA-ZEESM TL

DILI, 15 maiu 2020 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu Timor-Leste (ZEESM-TL), José Luís Guterres ‘Lugu’, iha loron 12 maiu hala’o vizita ba orfanatu Topu Honis hodi observa direta kondisaun moris labarik sira-nia no haree mós fasilidade iha fatin refere.

“Ha’u mai vizita sira hodi observa direta problema ne’ebé ita-nia labarik sira enfrenta. Ha’u haree katak orfanatu iha Topu Honis la’ós de’it ba Oé-Cusse oan, maibé sira mós simu labarik sira husi Dili, Baucau no Viqueque”, dehan Lugu liuhosi nota imprensa ne’ebé Agência Tatoli asesu, sesta ne’e.

Antes ne’e, Autoridade RAEOA apoiu ona nesesidade bázika ba orfanatu durante implementasaun Estadu Emerjénsia liuhosi kolaborasaun ho autoridade lokál sira no sei kontinua hodi tau matán ba orfanatu inklui apoiu nesesidade bázika sira seluk.

“Autoridade sei apoiu tuir kbiit ne’ebé iha hodi bele kontinua obra sarani nian ne’ebé Amu-Lulik Societas Verbi Divini (SVD) husik hela ba povu Atoni-oan sira”, nia subliña.

Iha parte seluk, hodi halo prevensaun surtu Coronavírus, Autoridade RAEOA kompremitidu liuhosi ekipa konjunta prevensaun COVID-19 RAEOA no sei kontinua halo nafatin sosializasaun kona-ba surtu COVID-19, hodi nune’e orfanatu oan sira bele komprende oinsá atu prevene husi moras ne’e.

Orfanatu Topu Honis oras ne’e iha oan kiak hamutuk 103 ne’ebé lokaliza iha Kutete, Oé-Cusse no orfanatu ne’e harii husi Padre SVD iha tinan 1993.

Ho distánsia maizumenus kilómetru 21 husi Sub-Rejiaun Pante Macassar, orfanatu Topu Honis  oferese mós fatin ba inan-feton kbiit laek sira.

“Ha’u kontente ho vizita husi Prezidente Autoridade, José Luís Guterres ho ekipa. Ha’u hato’o ba prezidente katak durante Estadu Emerjénsia ami hasoru problema kona-ba ai-han. Ami mós husu fini modo sira hodi kuda, nune’e bele sustenta ba labarik sira-nia ai-han”, dehan Koordenadora Orfanatu Topu Honis, Liliana Tarung.

Topu Honis mós finansia no maneja orfanatu ba labarik sira ho idade oioin, no mós uma-seguru no fatin protesaun ba inan-feton sira.

“Ami han loron-ida dala-tolu, ha’u gosta aprende lian tetun”, salienta estudante eskola primária ne’ebé hela mós iha orfanatu Topu Honis, Alcina Colo .

Iha biban ne’e, Prezidente Autoridade hala’o mós vizita ba inan-faluk na’in rua, Madalena Neno no Juliana Kutat ne’ebé Autoridade RAEOA apoiu ona nesesidade bázika iha semana hirak liubá iha Suku Bobocase, Sub-Rejiaun Pante Macassar.

Autoridade RAEOA sei kontinua oferese apoiu nesesidade bázika ba família kbiit laek sira iha Aldeia 63, Suku 18 iha Sub-Rejiaun Nítibe, Oé-silo, Pante Macassar no Pasabe durante surtu COVID-19 no Estadu Emerjénsia.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here