Vise-Ministru Administrasaun Estatál, Abílio José Caetano. Imajen TATOLI/Egas Cristóvão

DILI, 15 maiu 2020 (TATOLI)–Vise-Ministru Administrasaun Estatál (MAE), Abílio José Caetano, hateten ho situasaun pandemia COVID-19, Timor-Leste la[bele] komemora loron restaurasaun independénsia ba dala-18 (20 maiu 2002–20 maiu 2020) ne’ebé monu iha loron 20 maiu tinan ne’e.

“Ho ita-nia situasaun Estadu Emerjénsia ba COVID-19 nian, ha’u foti inisiativa rasik haruka ona karta ba Exelénsia Primeiru Ministru, Taur Matan Ruak, katak 20 maiu tinan ne’e ita sei lahalo komemorasaun hanesan tinan-tinan tanba ita enfrenta hela moras COVID-19,” dehan Ministru Estatal ba Ajénsia TATOLI iha nia knaar fatin, Caicoli, Dili, sesta ne’e.

Governante ne’e hatutan, serimónia hasa’e no hatún bandeira sei  la akontese inklui serimónia feira, jogu desportivu, misa no seluk tan.

“Ita-nia bandeira hasa’e hanesan loron baibain de’it,” dehan Vise-Ministru ne’e.

Tinan ne’e, nia informa, laiha komemorasaun ba restaurasaun independénsia TL nian, MAE propoin no husu disponobilidade Sua Exelénsia Prezidente Republika atu hato’o deskursu ida ba povu Timor-Leste tomak liga ho 20 maiu 2020 ne’e.

“Deskursu ida ne’e, podeser bele akontese iha loron 19 maiu 2020 oras 20:20 no bele mós akontese iha loron 20 maiu 2020 dadeer liuhosi kanál televizaun,” nia esklarese tan.

Maibé, tuir nia, to’o agora seidauk iha resposta no konfirmasaun ba karta hosi MAE no agora hein de’it, karik Prezidente Repúblika konkorda sei anúnsia liuhosi kanál televizaun maibé direta ka gravadu seidauk bele hatene.

“Karik ita halo serimónia 20 maiu entaun ita mós viola ona regra hosi Ministériu Saùde no Organizasaun Mundiál Saùde nian katak distansiamentu fíziku, sosiál no labele halibur malu liu ema na’in-lia (5) iha fatin ida,” nia dehan.

Nia hateten, desizaun ida ne’e duni mak sei hala’o tanba ohin loron 15 maiu ona no hela loron lima (5) de’it ona Timor-Leste atu komemora loron restaurasaun independénsia Timor-Leste ba dala-18 ne’e.

Relasiona ho komemorasaun refere, nia fó mensajen ba sidadaun TL katak serimónia restaurasaun independénsia la realiza hanesan baibain tanba Estadu Emerjénsia ba COVID-19.

“Maibé, ha’u nu’udar sidadaun ne’ebé responsável mós ba loron Nasionál hanesan loron restaurasaun independénsia TL nian, ha’u husu ba ita hotu katak maske la realiza maibé nafatin foti aas no konsidera aas loron 20 maiu nu’udar loron Nasionál ida ne’ebé ita restaura ita-nia independensia Nasioná, ne’ebé ita-nia lidér sira deklara katak TL independensia iha loron 28 novembru 1975,” nia tatoli.

Tanba ne’e, nia husu populasaun Timor-Leste atu hotu-hotu tenke fiar iha unidade hodi banati tuir lidér istóriku sira ne’ebé luta ba independénsia TL nian.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here