Aviaun Sriwijaya. Imajen/Sriwijaya-air.net

DILI, 15 maiu 2020 (TATOLI) – Embaixada Repúblika Indonézia iha Timor-Leste (KBRI, sigla Indonézia) iha sesta ne’e, fasilita repatriasaun sidadaun Indonézia hamutuk na’in-149 husi Dili ba Surabaya, Indonézia ho Aviaun Sriwijaya Air.

Husi sidadaun Indonézia hamutuk na’in-149, na’in 68 sei desloka ba Leste Java, na’in-69 sei desloka ba Sentrál Java, no seluk sei desloka ba Banten, Norte Sumatra, Lombok, Bali, Súl Kalimantan no Jambi.

Sidadaun Indonézia hirak ne’e hanesan traballadór migrante Indonézia, balun hanesan traballadór konstrusaun, mekániku, karpinteiru, empregadu privadu no komersiante.

Tanba Governu Timor-Leste hahú loron 4 abríl suspende provozóriu voo komersiál internasionál husi nasaun li’ur, inklui fronteira terrestre, maka repatriasaun sidadaun Indonézia ne’e ho kustu privadu rasik ho aviaun ne’ebé aluga (charter flight) ho koordenasaun entre KBRI no Governu Indonézia.

“KBRI Dili halo ona koordenasaun ho entidade relevante sira iha Indonézia relasiona ho dezlokasaun sidadaun Indonézia, liuliu ekipa Forsa Tarefa COVID-19 husi Leste Java no Sentrál Java, tanba maioria sidadaun ne’ebé desloka maihusi provínsia rua ne’e”, refere nota ofisiál husi KBRI ne’ebé Agência Tatoli asesu, sesta ne’e.

Hafoin atera iha Aeroportu Juanda Surabaya, Forsa Tarefa COVID-19 Leste Java no Sentrál Java sei mai foti sidadaun sira no sei lori ba fatin ida-idak, enkuantu sidadaun ho dirasaun provínsia seluk sei kontinua dezloka ba fatin destinasaun.

Nota ne’e subliña, kauza husi surtu COVID-19 ba setór ekonomia maka halo sidadaun hirak ne’e deside repatria husi Timor-Leste tanba balun maka lakon servisu.

Nune’e mós, balun tenke fila tanba fatin servisu taka provizóriu no haree ba oportunidade negósiu ne’ebé hahú limitadu.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here