Grupo Movimentu Tasi Mos servisu hamutuk ho Polisia Nasional Timor Leste rega disinfektante iha jardim Largo Lecidere no jardim BJ Habibie, Sexta 15 Maiu 2020.Imajen/Antonio Goncalves

DILI, 15 maiu 2020 (TATOLI)–Governu liuhosi Sekretáriu Estadu Meiu Ambiente (SEMA) kopera hamutuk ho autoridade seguransa Polísia Nasionál Timor Leste (PNTL) Munisípiu Dili no Movimentu Tasi Moos (MTM) hala’o atividade hamoos tasi no rega aimoruk dezinfetante ba fatin públiku sira iha Dili laran.

Sekretáriu Estadu Meiu Ambiente, Deometrio Amaral, hateten atividade ohin ne’e hanesan asaun konjunta ida hodi prepara Sidade Dili ba komemorasaun Loron Restaurasaun Independénsia 20 de Maiu ba tinan ne’e.

“Asaun konjunta husi SEMA hamutuk ho MTM no PNTL Munisípiu Dili hodi halo preparasaun ba restaurasaun Independénsia TL iha 20 maiu agora,” dehan Sekretáriu Estadu Meiu Ambiente, Deometrio Amaral, ba jornalista sira iha Largo Lesidere, Dili, sesta ne’e.

Nia hatutan, maski biban ne’ebé defisil maibé SEMA hakarak espasu públiku sira sai fatin ne’ebé saudavél ba ema hotu entaun hili espasu públiku hodi halo limpeza jeral ne’e.

“Limpeza jeral la’ós SEMA nian maibé Governu tomak nian. Tanba ne’e, Governu fó sai rezulusaun iha tinan kotuk katak semana ikus fulan ida-nian tenke halo limpeza jeral. Maibé durante ekipa limpeza ninian mak hala’o atividade ne’ebé akompania hosi Autoridade Munisípiu nian. Tanba ne’e, ita halo asaun kiik oan hodi’a ita-nia ambiente liuhosi limpeza ne’e,” nia esplika.

Aleinde ida ne’e, nia dehan, MTM ho PNTL Munisípiu Dili mós rega dezinfetante ba espasu públiku maibé ambiente rasik SEMA iha responsabilidade atu partisipa hodi hasa’e sensibilizasaun ba ema hotu katak COVID-19 ne’e ameasa ba ema hotu.

“COVID-19 ne’e ameasa ita. Tanba ne’e, ita labele halai, labele subar no labele rende. Maibé ita iha kapasidade atu kontra liuhosi hatoman-aan moris mesak no moos iha ambiente ne’ebé saudavél,” nia hateten.

Nia hateten, atividade ida ne’e hanesan fó korajen ba ema hotu tanba ema hotu hatene COVID-19 no Estadu Emerjénsia laiha institusaun estadu ida hodi halibur ema barak hanesan iha Munisípiu sira hotu.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here