Embaixador Xina Iha Timor-Leste hamutuk ho WFP entrega tenda armazen ba Ministeriu Saude. Imajen/TATOLI

DILI, 15 maiu 2020 (TATOLI)-Governu Austrália no mós Governu Xina liuhosi sira-nia Embaixadór iha Timor-Leste, iha sesta (15/05/2020) ohin kontinua oferese apoiu ekipamentu prevensaun surtu COVID-19 ba Ministériu Saúde.

Embaixadór Xina iha TL, Xiao Jianguo ho Reprezentante Programa Aihan Mundiál (WFP-sigla inglés) maka entrega tenda armazén ida ne’ebé mak konstrui ona husi Kompañia Internasionál Shanghai Contruction, ba Ministru Saúde en ezersísiu, Bonifácio Maucoli dos Reis ho Diretór Ezekutivu SAMES iha areadores SAMES Kampung-Alor, Dili hodi rai ekipamentu COVID-19.

Enkuantu, iha momentu hanesan Embaixadór Austrália, Peter Roberts, entrega ekipamentu protesaun pesoál hanesan maskra 165, luvas rihun 20-resin, sanitazer no oksijéniu 50. Apoiu ne’e simu diretamente husi Ministru Saúde en ezersísiu, Bonifácio Maucoli dos Reis.

Hafoin simu tiha ekipamentu hirak ne’e, Ministru Saúde en ezersísiu ne’e reprezenta Governu konstitusionál daualu agradese ba apoiu hotu-hotu tanba hakmaan ona responsabilidade governu nian.

Nia relata antes ne’e Governu Xina oferese ona termoscanner ba Ministériu Saúde no daudaun ne’e apoiu tan tenda armazén hodi rai fasilidade coronavirus.

“Iha fulan-abríl sira ajuda tan ekipamnetu médiku no mos ekipamentu protesaun sivil inklui maskra, luvas, botas, no selu seluk tan,” Governante ne’e esplika liután.

Iha parte seluk, Embaixadór Austrália, Peter Roberts, garante apoiu ne’ee sei tulun governu hodi kombate kazu COVID-19 iha Timor-Leste.

“Ami rekoiñese katak ekipamentu ne’e sei proteje ema ne’ebé luta hasoru Coronavirus hanesan enfermeiru, doutór, seguransa, no limpeja importente tebes,”dehan Diplomata Austrálianu ne’e.

Ikusliu, Diretór Ezekutivu SAMES, Santana Martins, orgullu ho apoiu ne’ebé oferese husi Governu Xina, Austrália no WFP.

“Agradese ba konfiansa tomak ne’ebé mak ita boot sira husi Embaixadór Xina iha Timor Leste no WFP ne’ebé fó ba SAMES hodi bele uza ba armazén emerjénsia ba COVID-19 nian,” dehan Diretór Ezekutivu SAMES, Santana Martins.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here