Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 14 maiu 2020 (TATOLI)–Portavós Sala Situasaun Sentru Integradu Jestaun Krize (CIGC, sigla portugés), Rui Maria de Araújo, ohin, atualiza dadus surtu COVID-19 ho totál kumulativu kazu konfirmadu nafatin 24, kazu konfirmadu foun nafatin zero durante semana tolu ona.

Nia hatutan, totál kazu rekuperadu laiha mudansa kompara ho horisehik iha ema na’in-23 no hosi 23 ne’e kazu konfirmadu na’in-19 no kazu provavel na’in-4 no ida ne’e sgnifika total kazu ativu ka nafatin baixa iha fatin Izolamentu Vera Crus hamutuk hotu na’in-lima (5).

“Totál ezame laboratóriu durante fulan ida-nia laran kazu kumulativu ne’ebé teste hamutuk 1220 no horisehik iha 1180. Total akumalitivu hosi amostra labóratoriu ne’ebé hein rezultadu hamutuk 343. Totál akumulativu rezultadu laboratóriu negativu hamutuk 855. Totál amostra vijilánsia sentinela ne’ebé hala’o iha Munisípiu sira hotu no iha ospitál sira hamutuk 637. Hosi 637 amostra ne’e iha 156 ka maizumenus 24% mak hatudu rezultadu negative,” dehan portavós CIGC, Rui Maria de Araújo ba jornalista sira iha Sentru Konvensaun Dili (CCD sigla portugés), kinta ne’e.

Portavós CIGC, Rui Maria informa, ema ne’ebé mak iha konfinamentu obrigatóriu to’o ohin meudia hamutuk 85. Hosi ema na’in-85 ne’e na’in-tolu (3) mak auto-kuarentena iha Dili no na’in-56 kuarentena iha fasilidade Governu nian iha Dili no na’in-26 iha fasilidade Governu nian iha Munisípiu seluk.

“Ida ne’e signifika totál ema ne’ebé liu ona períodu konfinamentu kuarentena hamutuk na’in 2181. Hosi númeru hirak ne’e, na’in- 478 mak kuarentena iha Munisípiu sira no ema nain-1703 iha Dili,” dehan Doutór Rui.

Nia subliña, fasilidade Saùde iha Timor-Leste funsiona hanesan baibain, ne’eduni sira ne’ebé presiza halo tratamentu keta reseu ka tauk atu ba fasilidade Saùde liuliu ba sira ne’ebé presiza nafatin aimoruk. Hanesan ema sira ne’ebé sofre tuberkulozu, hipertensaun no moras kronika sira seluk ne’ebé hemu aimoruk loron-loron no labele falta.

No kuidadu inan Isin rua, vasina ba labarik no kuidadu Saùde sira seluk maibé nafatin proteje an uza máskara.

Sentru Integradu Jestaun Krize apela ba polulasaun sira, maske númeru kazu afetadu la aumenta husu nafatin kumpre disiplina, regra distansiamentu sosiál koletivu hanesan la’o labele halibur malu liu ema na’in lima no uza nafatin máskara bainhira sirkula iha fatin ne’ebé ema barak hanesan iha loza.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here