DILI, 13 maiu 2020 (TATOLI)– Arsebispu Arkedioseze Metropolitana Dili ohin (13 maiu 2020), komemora loron aparisaun Nossa Senhora iha Cova da Iria, ho prosesaun lori ilas Na’in Feto hale’u Sidade Dili, inklui vizita Sentru Izolamentu Vera Crus no mós Kuarentena Tasi-tolu.

Hafoin prosisaun,  Sanselér Arkedioseze Metropolitana Dioseze Dili, Padre Paulus Maya hateten, prosisun ida-ne’e hanesan akollamentu hosi ideia sira mai hosi Arsebispu Arkedioseze Metropolitana Dioseze Dili, Dom Virgílio do Carmo da Silva, SDB, hamutuk ho kúria Arkedioseze nian.

“Ami halo planu molok fulan ne’e nian ho ninia realizasaun ne’e ohin. Tanba ne’e mak iha loron ida fulan maiu, Amu Arsebispu halo abertura ida ba fulan Rozário ida ne’e iha Kapela Bispu nian iha Lecidere, hodi konvida sarani sira hotu atu reza tersu loraik-loraik, iha  tuku 18.00,” Padre Paulus Maya hateten.

Kona-ba prosesaun ohin nian, Sanselér ne’e dehan, la involve sarani sira tanba Timor-Leste iha hela Estadu Emerjénsia maibé ilas Na’in Feto ne’e hatuur iha karreta laran ne’ebe akompaña hosi Arsebispu Arkedioseze Metropolitana Dioseze Dili, Dom Virgílio do Carmo da Silva, SDB, hodi vizita sarani sira iha Dili laran.

“Ho vizita ida ne’e, ita iha esperansa katak, Na’in Feto bele tulun ita, muda no transforma  ita-nia hanoin, ita-nia karáter nu’udár ema Kristaun loloos. Intensaun seluk, ita iha esperiénsia evanjélika katak Nossa Senhora ne’e, ninia serbisu boot tebes iha obra salvasaun nian,” nia esplika.

Padre Paulus fó ezemplu katak, iha festa kazamentu Kaná, ho Na’in Feto Nia prezensa, problema família nian rezolvida no Na’in Feto ninia vizita ba ninia prima Santa Isabel, ho ninia Prezensa lori esperansa foun, lori hakmatek no ksolok ba Santa Isabel.

“Atu dehan de’it katak, liuhosi Na’in Feto Virjem Maria, ita bele ba to’o Jesus,” nia subliña.

Tanba ne’e, nia dehan, situasaun ohin loron ho surtu COVID-19 ho mós situasaun politika la estável, Na’in Feto nia vizita bele lori mudansa rai doben Timor-Leste, liuliu timoroan ida-idak no nai-ulun sira, ho ulun malirin buka solusaun atu ema hotu bele moris iha situasaun ne’ebé di’ak no ksolok nia laran.

Tuir Amu nia observasaun katak, durante prosesaun, iha dalan sira, sarani barak partisipa hosi uma, balun hakne’ak iha estrada, balun organiza malu iha bairru sira hodi hein iha estrada ibun, sunu lilin, kari ai-funan ba ilas Na’in Feto no balun tanis.

“Ne’e atu dehan katak, ita nia sarani barak mak saudades. Tanba bai-bain sempre prosisun la’o hamutuk ho Na’in Feto no tinan ida ne’e Na’in Feto la’o mesak. Tanba ne’e, ita hein katak, la’ós hela ho saudades de’it maibé ho prezensa Na’in Feto nian bele transforma netik ema idaidak nia hanoin hodi moris iha ambiente páz iha família ida-idak no sosiedade,” nia espera.

Prosisaun ne’e akompaña direta hosi Arsebispu Arkedioseze Metropolitana Dili, Dom Virgílio do Carmo da Silva, SDB, Sanselér Arkedioseze Dili, Padre Paulus Maya, Korru Juicat Katedrál no hetan seguransa husi Polísia Nasionál Timor Leste (PNTL) Munisipiu Dili no Korpu Eskuteiru Dioseze Dili.

Mapa Prosisaun ne’e hahú hosi Tuku 15:00 sai hosi Igreja Katedrál ba vizita sala izolamentu Verra Kruz, liuhosi Taibesi, Bekora, Bekusi, Bedois, Bidau, tama iha Hospitál Nasionál Guido Valadares (HNGV), tun hosi Ponte Habibie, Motael, Palapasu, sa’e ba Ponte Maloa, Fatumeta, Lesibutak-Maleuana, Delta 3, Kuartél Jenerál F-FDTL Fatuhada, Ai-mutin, Fomentu, Igreja Komoro, Dalan Gruta Golgota, Tasitolu vizita kuarentena, fila fali mai liuhosi rotunda Komoro, tun hosi Tuti, Bebonuk, Pantai Kelapa, sae fali Ai-mutin, Fatuhada, Kolmera, no tama fali ba Igreja Katedrál hodi termina iha tuku 21:00 kalan.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here