HNGV. Imajen: rede sosiál

DILI, 14 maiu 2020 (TATOLI)-Xefe Unidade Operasaun Ospitál Nasionál Guido Valadares (HNGV-sigla portugés), Ernesto da Silva Pacheco hateten pasiente hamutuk 420 maka hetan ona operasaun husi médiku no doutór espesialista sira iha sala operasaun durante fulan marsu to’o loron 14 fulan maiu 2020.

Iha fulan-marsu atende operasaun ba pasiente hamutuk 187, abríl 153 no fulan maiu klaran hamutuk ema na’in 86.

”Entaun durante implementasaun estadu emerjénsia (EE) iha sala operasaun atende liu ba pasiente ne’ebé mak emerjénsia,” dehan nia ba Jornalista sira iha HNGV, kinta (14/05/2020).

Durante implementasaun EE, nia parte fó prioridade liu ba pasiente sira ho kondisaun grave hanesan kazu apenisitis, laparatomia hanesan kabun no atende kazu dezastre sira seluk.

“Inan isin-rua mós importante ita tenki opera tanba sira presiza moris no tulun oan ne’ebé iha kabun laran,”nia realsa tan.

Durante fulan-rua resin ne’e, nia parte la rejista kazu ema ruma maka mate hafoin halo operasaun.

“Durante ami halo operasaun ne’e la’os kazu apenis de’it no la’os sesariana de’it maibé kazu oioin mak ami opera hanesan tohar no kanek entaun kada loron kazu sira ne’e kahur malu maibé durante ami opera barak liu mak sesariana inan sira atu partu ne’e,” nia klarifika.

Sala operasaun iha médiku, doutór espesialista, inklui cleaner hamutuk ema na’in-52.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here