ise Ministru Saúde, Bonifácio Maucoli dos Reis. Imajen Tatoli/Antonio Goncalves.

DILI, 13 maiu 2020 (TATOLI)-Ministru Saúde En Ezersísiu, Bonifácio Maucoli dos Reis, informa daudaun ne’e veteranu na’in ida no sidadaun baibain na’in rua seluk mate ona iha Ospitál SiloaM Jakarta Indonézia hafoin Governu transfere hodi halo tratamentu saúde iha fulan hirak liubá.

Médiku husi Ospitál Siloan Jakarta la konsege salva sira-nia vida tanba sofre moras komplikasaun hanesan rins, aten, no fuan.

Pasiente Na’in tolu ne’ebé maka mate kompostu husi feto ida no mane na’in rua. Na’in ida mate durante fulan-abríl no rua seluk foin maka mate iha loron rua liubá.

Governante hateten na’in ida ne’ebé maka mate iha fulan-abríl governu la konsege translada ninia isin mate mai rai-laran, no hakoi ona iha Indonézia tanba durante implementasaun lock down.

Enkuantu, isin-mate veteranu no sidadaun baibain ida seluk governu sei buka meiu hodi translada sira-nia isin mate mai Timor-Leste.

”Entaun ida mate uluk ne’e iha estadu emerjénsia iha fulan-abríl nian no ami orienta katak hakoi iha Indonézia entaun horiseik ho horibainrua mate tan dala ida veteranu no ema baibain ida”, dehan Vise Ministru Estratéjiku Dezenvolvimentu Saúde ne’e ba jornalista sira iha Ministériu Finansa Ai-Tarak-Laran, ohin.

Hodi hatutan, atu translada mate isin rua ne’e mai rai-laran, Ministériu Saúde halo ona koordenasaun servisu ho Ministériu Negósiu Estranjeiru no Kooperasaun, Ministériu Transporte no Telekomunikasaun inklui Ministériu Interiór.

“Tanba ita aproveita aviaun ida (Indonézia) atu mai halo re-patriasaun ba sidadaun Indonézia ne’ebé mak iha ne’e atu fila purvolta 100-resin, maibé ami sei kontaktu hela bele ka lae translada mate isin rua ne’e mai”, katak Bonifácio.

Bainhira atu translada mate-isin hirak ne’e, aviaun tenke semo liuhosi Provinsia Sulawesi Indonézia depois maka bele mai Timor-Leste.

“Ami sei trata hela karik iha posibilidade bele lori mai, ami prontu, se labele entaun hakoi nafatin iha Jakarta, Indonézia hodi hein too situasaun normál mak ita bele hasai fali sira nia ruin”, katak nia.

Kona-ba prosesu pagamentu ba ospitál sira iha rai-li’ur agora daudaun la’o hela, maibé pagamentu ba aluga fatin, hahán ba pasiente sira maka sei atraza tanba presiza rekolla invoice sira para hetan pagamentu.

Nia relata pasiente sira ne’ebé maka halo tratamentu saúde durante tinan kotuk to’o inisíu 2020 hamutuk ema 100-resin iha Siloam Jakarta, Sangla Bali, Indonézia, Ospitál Singapura no Malázia.

Jornalista : Felicidade Ximenes

Editór        : Agapito Santos

HAKEREK NO HATÁN

Please enter your comment!
Please enter your name here