Primeiru-Ministru, Taur Matan Ruak, prezide reuniaun Konsellu Ministru iha Salaun Ministériu Finansa, Aitarak-Laran, kuarta (13/05). Imajen Tatoli/Egas Cristovão

DILI, 13 maiu 2020 (TATOLI) – Primeiru-Ministru (PM), Taur Matan Ruak aprezenta ba Konsellu Ministru (KM), Projetu Dekretu-Lei ba alterasaun dahuluk Dekretu-Lei númeru 14/2018 17 agostu, kona-ba orgánika VIII Governu Konstitusionál.

Liuhosi diploma ne’e, sei prevee ezisténsia Vise-PM na’in-rua hodi fó apoiu ba Xefe Governu iha ninia kna’ar.

“Vise-PM 1 sei tau matan liu ba asuntu sosiál sira no Vise-PM 2 sei haree ba asuntu ordenamentu no planeamentu”, informa Ministru Reforma Lejizlativa no Asuntu Parlamentár, Fidelis Manuel Leite Magalhães liuhosi konferénsia kmprensa hafoin reuniaun ezekutivu iha Salaun Ministériu Finansa (MF), Aitarak-laran, kuarta ne’e.

Orgánika foun ne’e sei iha Ministru ida ba Asuntu Parlamentár no Komunikasaun Sosiál, Ministru ba Planu no Ordenamentu Territóriu, Vise-Ministru ida ba Turizmu, Kultura, no Komunitáriu, Vise-Ministru ida ba Komérsiu no Indústria no Vise-Ministru Interiór ida.

Iha estrutura foun ne’e, hasai kargu governamentál husi Ministru Reforma, Lejizlativa no Asuntu Parlamentár no Ministru Planeamentu no Investimentu Estratéjiku no la prevee tan ezisténsia Ministru Estadu.

“Ho prezente Dekretu-Lei ne’e rasik, atribuisaun materiál reforma lejizlativa, prosesu lejizlativu no reforma administrativa sei transfere ba Prezidénsia Konsellu Ministru. Ministériu Justisa sei konsentra atribuisaun Governu nian kona-ba matéria reforma judisiária, Ministériu Planu no Ordenamentu sei subtitui Ministériu Planeamentu no Investimentu Estratéjiku, hetan responsabilidade ba atribuisaun governamentál iha matéria planeamentu no ordenamentu territoriál, no Ministériu Obra públika atu prosege atribuisaun sira hotu kona-ba matéria planeamentu urbanu”, relata Fidelis.

Sekretáriadu g7+ ne’ebé antes ne’e tutela iha Prezidénsia Konsellu Ministru (PCM, sigla portugés), iha estrutura foun instituisaun ne’e sei sai órgaun independente, enkuantu Komisaun Nasionál Aprovizionamentu (CNA, sigla portugés) sei integra ba Ministériu Finansa.

“Hasai hosi PCM tanba g7+ ne’e entidade ketak ida tiha ona, nia entidade ida ne’ebé agora ne’e nia independente nia la tama iha kuadru administrasaun públiku nian, ne’ebé la persija atu enkuadra iha ministériu ida nia okos, maibé tau nia hanesan entidade ketak ida nia ne’ebé la tama iha iha estrutura Governu nian. La signifika halo mate, maibé hasai tiha tanba g7+ entidade independente ida”, governante ne’e subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here