Ministru Transporte no Komunikasaun, José Agostinho da Silva. Imajen Tatoli/Egas Cristovão

DILI, 13 maiu 2020 (TATOLI)-Ministru Transporte no Komunikasaun, José Agostinho da Silva, informa Governu liuhosi reuniaun Konsellu Ministru foinlalais aprova ona osan rihun  $ 600 ba Ministériu Edukasaun Juventude no Desportu ho Ministeriu Ensinu Superiór Siénsia no Kultura hodi oferese liña internet gratuita ba estudante sira durante implementasaun estadu emerjénsia.

José Agostinho da Silva, optimista MEJD ho MESSK sei implementa orsamentu ne’e iha tempu besik.

“Ita optimista apoiu liña internet gratuita ne’e sei realiza, maski Estadu Emerjénsia ne’e besik ramata ona importante mak parte hotu iha ispíritu no boa-vontade bele aselera prosesu ne’e,” dehan Governante ba jornalista sira hafoin reuniaun Konsellu Ministru, iha Ministériu Finansa, Ai-Tarak-Laran Dili, kuarta (13/05/2020).

Maski orsamentu ne’e aprova ona maibé sei hein tranferénsia hosi Komisaun Integradu Jestaun Krize (CIGC-sigla portugés) hodi bele ezekuta.

“konforme fundu ne’ebé aprova ona ba liña internet nian, purvolta rihun 600 kada Ministériu, hosi ministériu rua ne’e sei aloka rihun 300 atu bele fasilita ita nia estudante sira hodi asesu ba programa eskola online,”tenik tan.

Husi apoiu MTK nian ba programa internet gratuita ne’e maka konsege aproxima ona kompañia telekomunkasaun Telcomsel, Timor-Telekom no Telemor hodi apoiu implementa planu ne’e.

Jornalista : Tomé Amado

Editór       : Agapito dos Santos

2 KOMENTÁRIU

  1. Orsamento nebe aprova latuir condisaun nebe iha.. Liu-liu tempo EE mos atu remata ona.. Orsamento brk hanesan ne ba linha Internet deit ne’e la logica.. Cuitado tebes ba Ministerio Educasaun nebe laiha plano nebe claro e lahatene los atu gasta $600.000 USD ho mekanismu oinsa.. Estudante iha Rural neim iha equipamentos atu asesu Internet.. Espera sira halao ho transparencia e profesional duni..

  2. ANC MOS TENKE CONTROLA ATU NUNE REDE BELE DIAK LAVELE IHA MANIPULASAUN… ATU COMPANHIA NAIN COTROLA MAXIMO TEKNICO SIRA.

HAKEREK NO HATÁN

Please enter your comment!
Please enter your name here