Teste amostra ba COVID-19. Imajen/Espesiál

COVALIMA, 13 maiu 2020 (TATOLI) – Ministériu Saúde (MS) hamutuk ho Sentru Integradu Jestaun Krize (CIGC, sigla portugés), realiza vijilánsia sentinela no triajen hodi buka hatene karik iha ona transmisaun lokál COVID-19 iha komunidade no prosesu dahuluk hahú iha loron 5 to’o 8 maiu no hahú loron 11 to’o 15 maiu sei hala’o ba daruak iha munisípiu sira. 

Ba inisiativa ida ne’e, Diretór Ospitál Referál Suai, Nazário Barreto, informa husi atividade ne’e konsege foti amostra ba ema na’in-50, relasiona ho triajen ne’ebé MS aplika.

“Agora daudaun ami sei hapara, maibé karik pasiente sira seluk maka mai ho sintoma respiratóriu no mós iha kontaktu ka viajen ruma ba fatin ne’ebé afetadu, maka ami mós foti amostra ba ida-ne’e”, hateten Dirijente ne’e iha Ospitál Referál Suai, kuarta ne’e.

Nia adianta, amostra sira ne’e husi parte óspitál haruka ona ba nasionál maibé husi parte MS seidauk fó sai rezultadu.

“Ami seidauk simu rezultadu ruma husi Ministériu Saúd. Karik maka pozitivu balun iha, entaun sira informa kedas mai ami maibé agora seidauk”, nia realsa.

Nazário Barreto esplika, triajen ne’ebé maka aplika iha Ospitál Referál Suai maka iha faze tolu hanesan bainhira pasiente mai, pesoál saúde sira halo identifikasaun ba pasiente ho sintoma respiratóriu, hafoin haruka pasiente ne’e halo evaluasaun ba ninia tensaun no temperatura isin no ikus liu maka pasa pasiente ne’e ba médiku sira hodi hetan esplikasaun.

“Bainhira ita atu hasai ema ne’e nia amostra ba COVID-19, ita sei esplika didi’ak no sei hatan akordu husi pasiente ne’e rasik se nia konkorda maka ita sei hasai  nia amostra, maibé ba sira ne’ebé maka laiha konkordánsia normalmente ami laiha obrigasaun atu foti nia amostra”, nia akresenta.

Maliana Halo Teste Amostra ba Na’in-27

Iha sorin seluk, Diretór Ospitál Referál Maliana, Bourdaloue Fernandes Moniz, informa huhú husi  loron  6 to’o 12 maiu, husi vijilánsia sentinela ne’ebé maka aplika hafoin hetan orientasaun husi MS, maka halo ona teste amostra ba ema na’in -27.

“Ami halo teste amostra ba ema na’in-27 no husi totál ne’e ami haruka hotu ona ba nasionál”, nia dehan.

Tuir Diretór ne’e, iha loron ida sira bele foti amostra ba ema na’in-tolu ka haat, depende ba ema ne’ebé halo konsulta iha ospitál nune’e husi parte óspitál  haruka kedan ba Dili tanba teste amostra nia prazu iha 24 oras no labele liu.

“Ami seidauk hetan rezultadu husi nasionál tanba sei prosesu hela. Ita hatene katak iha laboratóriu nasionál kada loron halo teste amostra barak ba pasiente sira, liuliu ba ema sira iha kuarentena sira. Tanba ne’e, ami sei hein kuandu rezultadu mai maka hatudu rezultadu negativu maka ami sei fó sai ba ita-nia komunidade sira iha ne’e maibé kuadu pozitivu ami koopera hodi pasiente sira hodi tun ba Dili hodi tama ba fatin izolamentu”, Bourdaloue Fernandes realsa.

“Moras ne’e (COVID-19) perigozu tebes. Ha’u hanoin ita hotu tenke koopera tanba moras ne’e la’ós halimar”, nia subliña.

Maski nune’e, husi parte Ospitál Referál Maliana sei kontinua nafatin halo konsulta ba pasiente sira no kontinua foti amostra.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here