Ekipa CIGC hamutuk ho Ajénsia Maluk Timor observa Ospitál Referál Maliana ne’ebé sei reabilita sai fatin izolamentu. Imajen Tatoli/Natalino Costa

BOBONARO, 12 maiu 2020 (TATOLI) – Governu Austrália liuhosi Ajénsia Maluk Timor, prontu apoia Sentru Integradu Jestaun Krize (CIGC, sigla portugés) hodi reabilita Ospitál Referál Maliana ne’ebé konsidera viável, nune’e bele uza nu’udar fatin izolamentu ba pasiente COVID-19.

Reprezentante Ajénsia Maluk Timor, Rosie Howitt, hateten Maluk Timor hamutuk ho ekipa CIGC mai halo vizita  iha Munisípiu Bobonaro, Postu Administrativu Maliana atu halo asesmentu ida hodi haree besik fatin balun iha Maliana ne’ebé konsidera bele reabilita sai fatin izolamentu ba kazu COVID-19.

“Ami-nia vizita ne’e ba daruak, ne’ebé akompaña husi ekipa CIGC hodi observa fatin balun karik bele halo sai fatin izolamentu. No ohin ami mai haree Ospitál Referál Maliana iha espasu balun ne’ebé la uza, nune’e ami aproveita haree fatin hodi reabilita sai fatin izolamentu ba COVID-19 nian”, dehan Rosie Howitt hafoin ramata halo observsaun ba fatin reabilitasaun fatin izolamentu, iha Óspitál Referál Maliana, tersa ne’e.

Nia adianta, husi parte Diretór Ospitál Referál Maliana rasik konkordo fó fatin balun ne’ebé abandona nune’e bele reabilita.

Representante Ajénsia Maluk Timor haktuir, hafoin ajénsia ne’e halo observsaun ba fatin ne’e, maka sei ba halo diskusaun ba orsamentu no dezeñu ba reabilitasaun rasik.

“Fatin ita hetan ona iha Ospitál Referál Maliana maibé ami seidauk hatene katak atu hahú reabilitasaun bainhira, tanba ami fila sei deskute no haree ba montante osan ba reabilitasaun no mós ami sei prepara nia dezeñu ba reabilitasaun ne’ebé ami sei halo iha tempu badak nia-laran bainhira buat sira ne’e loos ona”,  nia salienta

Nia reforsa, kooperasaun ne’ebé ajénsia australiana ne’e halo sei la to’o iha ne’e maibé sei kontinua no sei koopera nafatin ho Governu Timor-Leste bainhira presiza.

Iha fatin hanesan, representante CIGC, Hermenegildo Guterres, hateten ohin husi parte Ajénsia Maluk Timor akompaña ekipa CIGC halo vizita daruak mai ospitál ne’e atu haree besik liután.

“Husi parseiru Embaixada Austrália nian atu mai haree no hakarak ajuda ita atu instala fatin izolamentu COVID-19 nian iha ne’e”, nia akresenta.

Husi parte CIGC rasik sei prepara dezeñu no orsamentu nune’e bele submete ba Sekretariadu Fundu COVID-19 nia no sei ko’alia fali ho parseiru sira kona-ba sira ninia kapasidade atu ajuda to’o ne’ebé, nune’e bele hahú implemeta ona.

Tuir nia, kona-ba orsamentu loloos ba gastu reabilitasaun fatin izolamentu husi parte CIGC ladun hatene tanba sei iha aborjen liuhosi Ajénsia Maluk Timor ho Governu Timor-Leste rasik.

“Ami la hatene osan hira maka atu gasta ba iha reabilitasaun ne’e tanba sei iha koordenasaun entre Governu Austrália liuhosi nia Ajénsia Maluk Timor no ita-nia Governu”, nia realsa.

Hermenegildo Guterres informa, hafoin COVID-19 ne’e ramata fatin sira ne’ebé parseiru sira ajuda reabilita, iha futuru bele sai fatin ne’ebé bele uza ba kestaun seluk.

Nune’e mós, tuir Diretór Ospitál Referál Maliana, Bourdaloue Fernandes Moniz, ospitál ne’e iha espasu sufiente atu oferese ba CIGC harii fatin izolamentu.

“Ami iha rai ektare ida hodi oferese ba ekipa Jestaun Krize no ninia parseiru atu harii fatin izolamentu”, Bourdaloue Fernandes salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here