Rai iha Batugade ne’ebé UPF oferese ba CIGC hodi halo sai fatin kuarentena. Imajen Tatoli/Natalino Costa

BALIBO, 11 maiu 2020 (TATOLI) – Polísia Unidade Patrullamentu Fronteira (UPF) oferese rai ektare ida-resin iha Batugade, Postu Administrativu Balibo, Munisípiu Bobonaro ba Sentru Integradu Jestaun Krize (CIGC, sigla portugés) hodi instala fatin kuarentena obrigatóriu ba sidadaun ne’ebé maihusi nasaun afetadu COVID-19 no tama husi Fronteira Batugade.

Iha segunda ne’e, ekipa UPF ne’ebé lidera husi Komandante UPF Superintendente João Belo dos Reis, hamutuk ho ekipa husi Ministériu Saúde (MS) no CIGC, inklui Ajénsia Dezenvolvimentu Nasionál (ADN) halo observasaun iha fatin ne’ebé tuir planu sei halo fatin kuarentena.

“Karik aban bain-rua instala fatin kuarentena ne’e seguransa ne’e kontrola husi parte ami-nia no fatin ne’e besik husi fronteira, tanba ne’e ema sira maka tama ilegál tantu tama legál mai ita-nia territóriu, transportasaun mai ne’e besik nune’e kuarentena loron 14 iha ne’e maka lori ba Dili ka ba sira ninia hela fatin”, dehan Komandante Jõao Belo iha Batugade.

Aleinde ne’e, tuir Komandante ne’e, benefísiu instala fatin kuarentena iha área ne’e maka bainhira programa COVID-19 aban bain-rua ramata maka fatin ne’e UPF sei uza hanesan kazerna ba membru sira.

“Ami-nia esperansa bele mai instala iha ne’e atu UPF kontinua uza hanesan kazerna. Tanba ne’e, ami oferese rai ektare ida-resin atubele monta kuarentena”, nia salienta.

Parte seluk, nia mós rekoñese maski rai ne’e luan maibé UPF rasik daudaun iha limitasaun infraestrutura.

“Bainhira haree ba oportunidade, ita harii instalasaun iha fatin seluk hafoin laiha ninia kontinuasaun aban bain-rua sei abandonadu”, nia akresenta.

Tuir Komandante ne’e, rai ne’e rasik pertense UPF nia, ne’ebé kuaze ektare 20.

“Ha’u aprezenta ba komisaun atubele haree no sira mai ida agora ba dala-rua ona”, nia adianta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here