Logotipu Tane Konsumidór. Imajen/Espesiál

DILI, 11 maiu 2020  (TATOLI) – Asosiasaun Tane Konsumidór preokupa ho folin mina iha Timor-Leste ne’ebé kontinua aas maski folin mina mundiál tun tebes, nune’e advokasia ba konsumidór ne’e husu ba Governu atu dekreta hatún folin mina ba porsentu 5 iha períodu Estadu Emerjénsia.

“Husu ba operadór ekonómika sira haree filafali folin mina nian, hodi reflete ba folin barríl mina nian. Husu mós ba Governu atu dekreta hatún folin mina ba porsentu 5 durante períodu Estadu Emerjénsia tanba folin gazolina ho gazoleo iha Timor-Leste la akompaña ho tendénsia mundu nian no husu ba  Autoridade Nasionál Petróleu no Mineral (ANPM), liuliu ba Departementu Servisu Down Stream hodi fiskliza no regula ba merkadu distribuisaun  mina nian, liliu ba fiskalizasaun ba prátika folin sira,” refere nota imprensa ne’ebé Agência Tatoli asesu, segunda ne’e.

Tuir  nota ne’e, atu fó tulun ba konsumidór timor-oan iha krize pandemia globál, Governu presiza hola medida sira hodi rekupera ekonómika liuhosi pakote ba COVID-19 ne’ebé vigora iha Estadu Emerjénsia maibé folin mina la hatama mós iha lista ne´ebé mak hetan tulun.

Ho nune’e, Tane Konsumidór husu ba operadór ekonómika sira bainhira fa’an mina iha Timor-Leste presiza haree folin mina-nia tuir folin iha nível internasional.

Tanba haree ba paralizasaun ekonomia iha nível internasionál iha krize pandémia COVID-19, folin barríl mina to’o iha limite hafoin ba dahuluk valór nagativu.

“Hatene katak krize ne´e sei la’o naruk, rekuperasaun ekonómiku sei neneik no sei iha de’it prokura tun mundiál ba mina no produtu derivadu sira. Konsekuénsia hatudu ona iha rai barak folin mina monu, balun atinji to’o porsentu 30 ne’ebé sei estima prolonga to’o tinan-rua nia laran”,  refere nota imprensa ne’e.

Advokasia ba konsumidór ne’e observa, durante ne’e Governu hola ona medida hodi aprova Pakote Ekonómika hodi luta kontra COVID-19 ho objetivu fó tulun ba ekonomia nasionál durante períodu  Estadu Emerjénsia no hodi fasilita rekuperasuan ekonómiku ne’ebé sei haree liu ba pilár neen  hanesan konetividade, sasan sira, telekomunikasaun, servisu báziku, kréditu no tulun direitu.

Iha konteksu esesionál ne’e, Tane Konsumidór ninia preokupasaun kona-ba folin mina tanba folin mina iha merkadu internasionál kuaze tun hotu maibé seidauk reflete iha folin mina nasionál iha Timor-Leste.

Tane Konsumidór Halo Levantamentu Dadus

Tuir dadus levantamentu husi Tane Konsumidór ba folin mina iha estasaun mina sira iha Dili laran, operadór ekonómika sira kontinua prátika folin hanesan bainbain ne’ebé prejudika konsumidór sira, hanesan la hetan benefísiu folin mina ne´ebé monu no kontinua sofre ho prátika ne´ebé la justu ba definisaun folin mina.

“Iha situasaun ne´e prejudika konsumidór sira hodi konsidere iha tempu ba krize ne´ebé ita hasoru ho grave impaktu ekonómika no sosiál ba timor-oan sira”, nota ne’e esplika.

Entertantu, tuir dadus levantamentu husi asosiasaun ne’e ba folin mina nasionál kada litru iha Timor-Leste iha loron tersa (05/5) hanesan  Pertamina Int, gazolina ho folin sentavu 0,91 no gazoél sentavu 0,92, ETO folin gazolina sentavu  0,87 no gazoél sentavu 0,86, Realistic  folin  gazolina sentavu 0,90 no gazóel sentavu 0,85, East Gaz folin gazolina sentavu 0,85 no gazóel sentavu 0,85, Mega Petroleo folin  gazolina sentavu 0,90 no gazóel sentavu 0,98, Mira Mar fuel folin  gazolina sentavu 0,91 no gazóel sentavu 0,89, Aitula folin  gazolina $1.02 no gazóel sentavu 0,96.

Nune’e mós Pertamina 99 Fuel station folin  gazolina sentavu 0.91 no gazóel sentavu 0,89, 68 Fuel Station folin  gazolina sentavu 0,91 no gazóel sentavu 0,89, Log Fuel folin  gazolina  $1,04 no gazóel $1, Borala folin  gazolina sentavu 0,91 no gazóel sentavu 0,90, MG fuel folin gazolina sentavu 0,96 no gazóel sentavu 0,93 no MF fuel folin gazolina $1,04 no gazóel $1.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here