Sekretáriu Estadu Juventude no Desportu, Nélio Isaac Sarmento. Imajen Tatoli/Egas Cristóvão

DILI, 11 maiu 2020 (TATOLI)–Daudaun ne’e partidu Congresso Nacional da Reconstrução  de Timor (CNRT-sigla Portugés), husu ba membru-sira hotu atu retira hosi VIII Governu ne’ebé lidera hosi Primeiru-Ministru, Taur Matan Ruak.

Tanba ne’e, Sekretáriu Estadu Juventude no Desportu, Nélio Isaac Sarmento hanesan membru Governu ne’ebé mai hosi CNRT hateten, nia seidauk simu karta hosi partidu nune’e seidauk rezigna-an hosi Governu no nia respeita nafatin desizaun Taur Matan Ruak nian ne’ebé husu sira atu servisu nafatin.

“Ha’u seidauk simu karta ruma hosi partidu entaun ha’u sei hala’o nafatin servisu. Foin lalais, Primeiru-Ministru dehan ona ami sei servisu nafatin. Ha’u respeita desizaun Primeiru-Ministru nian,” dehan Nélio ba Agéncia TATOLI iha edifisiu SEJD, Lecidere, Dili, segunda ne’e.

Nia dehan, bainhira karta ofisiál ruma hosi partidu no entrega ona ba nia liman, hakarak lakohi tenke husik duni pasta SEJD.

“Agora ha’u seidauk fó komentáriu klaru atu sai ka la sai,” nia informa.

Jornalista: Hortencio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here