Koordenadora UPMA, Brígida Soares. Imajen Tatoli/António Gonçalves

DILI, 11 maiu 2020 (TATOLI) – Primeiru-Ministru (PM), Taur Matan Ruak konvoka reuniaun ho Unidade Planeamentu, Monitorizasaun no Avaliasaun (UPMA), ne’e tutela ba Gabinete Primeiru-Ministru hodi fó orientasaun ba preparasaun Orsamentu Jéral Estadu (OJE) 2020 inklui 2021.

“Reuniaun ida-ne’e hanesan reuniaun informál. Primeiru-Ministru bolu ekipa UPMA atu haree ona preparasaun ba orsamentu 2020 no mós orsamentu 2021, ne’e diskusaun interna ida, hodi halo preparasaun ba orsamentu rua ne’e”, informa Koordenadora UPMA, Brígida Soares, hafoin enkontru ho Xefe Governu iha Palásiu Governu, segunda ne’e.

Kona-ba OJE 2020 ne’ebé sumba ona iha Parlamentu Nasionál, Brígida esplika preparasaun agora ne’e tenke la’o nafatin iha nível tékniku.

“Tékniku tenke prepara ba senáriu ne’ebé de’it maka sei akontese. Tanba ne’e, preparasaun ida-ne’e ami nu’udar Unidade Planeamentu, Monitorizasaun no Avaliasaun tenke prontu bainhira Governu la’o normál filafali ka buat ruma akontese hanesan Governu foun karik ita seidauk bele hatene maibé preparasaun tenke la’o nafatin”, nia subliña.

Enkontru tékniku ne’e partisipa husi Koordenadór Apoiu Sosiedade Sivíl, Filipe da Costa Asesor Frei Mátires da Costa Guterres, Asesór Guteriano Neves, Koordenadór Sentru Integradu Jestaun Krize (CIGC, sigla portugés), Kapitaun Mar e Guerra, Donaciano da Costa Gomes ‘Pedro Klamar Fuik’, no Koordenadora UPMA, Brígida Soares.

Entretantu, iha loron 17 janeiru 2020, Proposta OJE 2020 la pasa iha diskusaun faze jeneralidade iha plenária Parlamentu Nasionál, ho rezultadu votasaun a-favór 13, kontra 15 no abstensaun 25.

Proposta foun OJE 2020 ne’ebé la pasa ho montante biliaun $1,668, ne’ebé kompostu husi sálariu no vensimentu millaun $235,6, sasán no serbisu millaun $561,8, transferénsia públika millaun $329,706, kapitál menór millaun $31,548 no kapitál dezenvolvimentu millaun $488,837.

Nune’e, husi janeiru to’o agora Governu hahú uza hela dotasaun orsamentu temporária hodi sustenta mákina Estadu ho ninia limitasaun to’o iha OJE foun.

Jornalista: Antónia Gusmão
Editora: Julia Chatarina

HAKEREK NO HATÁN

Please enter your comment!
Please enter your name here