Ministru Transporte no Komunikasaun, José Agostinho da Silva. Imajen Tatoli/Egas Cristovão

DILI, 11 maiu 2020 (TATOLI) – Primeiru-Ministru, Taur Matan Ruak akompaña husi Ministru Transporte no Komunikasaun, José Agostinho da Silva, konvoka enkontru ho Koordenadór Rezidente Organizasaun Nasaun Unida (ONU), Roy Trivedy, hodi ko’alia asuntu asisténsia umanitária ba Timor-Leste durante períodu luta kontra COVID-19.

Ministru José Agostinho, informa, liuhosi karta Sekretáriu Jerál ONU iha posibilidade atu fasilita kargu rejionál no pasajeiru kada país inklui Timor-Leste hodi suporta asisténsia umanitária.

“Enkontru ida-ne’e, ami ko’alia kona-ba oinsá ita-nia preparasaun ba futuru atu konkretiza inisiativa ne’e, tanba apoia ida-ne’e nu’udar asisténsia umanitária ba Timor-Leste oinsá atu fasilita ekipamentu médiku liuliu ai-moruk no fasilita ita tanba iha hela planu atu sosa ai-han foos husi rai-li’ur”, tenik Ministru hafoin enkontru iha Palásiu Governu, segunda ne’e.

Governante ne’e adianta, Governu Timor-Leste hakarak halo akuizasaun husi nasaun estranjeiru no presiza transportasaun aéreu.

“Ita presiza transportasaun. Tanba ne’e mak Sekretáriu Jerál Nasaun Unida manda karta ida mai atu fasilita kargu rejionál no mós pasajeiru hodi fasilita Timor-Leste ligadu ba COVID-19 nian”, nia akresenta.

Iha sorin Seluk, Koordenadór Rezidente ONU, Roy Trivedy, hateten Nasaun Unida liuhosi World Food Organization (WFP) prontu fasilita asisténsia umanitária iha setór aéreu.

Nia haktuir, enkontru ho Xefe Governu hodi ko’alia kona-ba planu nível globál kona-ba suporta umanitária iha setór aéreu nian, liuliu charter voo ne’ebé organizada husi WFP inklui parseiru ONU ne’ebé atu ajuda kada país hodi fó apoiu umanitária hanesan seguransa ai-han no ai-moruk ba kada país no pesoál.

“Primeiru Ministru enkoraja ami atu esplora situasaun ne’e ho parte ONU no WFP hodi ajuda Timor-Leste bainhira presiza apoia ruma”, nia akresenta.

ONU liuhosi WFP prontu ajuda Timor-Leste atu importa foos husi Vietname no Cambodia.

“Ami prontu atu ajuda Governu kuandu presiza ami-nia suporta atu kombate hamlaha liuhosi importasaun foos husi rai-li’ur”, nia garante.

Kona-ba prosesu akuizisaun ai-moruk, ONU prepara hela relatóriu atu aban bele partilla informasaun ba Sentru Integradu Jestaun Krize (CIGC, sigla portugés).

“Ha’u pesoálmente iha konfiasa antes fulan ne’e, faze dahuluk ai-moruk bele to’o Timor-Leste”, nia garante.

Jornalista: Florencio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here